ఖమ్మం రూరల్: ఖమ్మం జిల్లాలో మతసామరస్యం వెల్లివిరిసింది. భక్తికి మతాలు అడ్డుకావని, ఇందూ, ముస్లిం భాయి భాయి అని ఓ ముస్లిం సోదరుడు నిరూపించాడు. వివరాల్లోకి వెళ్తే..ఎదులాపురం మున్సిపాలిటీ పరిధిలోని 29వ వార్డు శ్రీరాంనగర్లో ని గణేష్ మండపం వద్ద జరిగిన వేలంపాటలో వినాయకుడి లడ్డు(Ganesh laddu) రూ.60, 500 ధర పలికింది. గణేష్ నిమజ్జనానికి ఒక రోజు ముందుగా మంగళవారం రాత్రి మండపం వద్ద నిర్వాహకులు లడ్డూ వేలం నిర్వహించారు. వేలంపాటలో పలువురు కాలనీవాసులు లడ్డును దక్కించుకునేందుకు పోటీపడ్డారు. చివరకు ముస్లిం మైనార్టీ నేత( Muslim leader) షేక్ హుస్సేన్ రూ.60, 500 కు సొంతం చేసుకోవడం విశేషం.
దీంతో నవరాత్రి వేడుకలు మతసామరస్యనికి సాక్షిగా నిలిచింది. ముస్లిం మతానికి చెందిన హుస్సేన్ అంత ధర పెట్టి లడ్డును సొంతం చేసుకోవడం పట్ల కాలనీవాసులు హర్షం వ్యక్తం చేశారు. లడ్డు సొంతం చేసుకున్న హుస్సేన్ గత కొద్ది సంవత్సరాలుగా ఈ ప్రాంతంలో కుల మతాలకు అతీతంగా పలు పండుగలు, శుభ కార్యాలయాల్లో పాల్గొంటూ ప్రతి ఒక్కరికి ఆదర్శంగా నిలుస్తున్నాడు. ఈ క్రమంలోనే గణేష్ లడ్డు సొంతం చేసుకోవడం పట్ల హుస్సేన్ కు సబ్బండా వర్గాల నుంచి అభినందనలు వెల్లువెత్తుతున్నాయి.
