కరువుకు పేరుగాంచిన అనంతపురం జిల్లాలో ద్రాక్ష సాగుతో ఓ మహిళా రైతు అద్భుతమైన ఫలితాలను సాధించారు. పూలకుంట గ్రామానికి చెందిన కృష్ణవేణమ్మ తనకున్న ఒకటిన్నర ఎకరాల ద్రాక్ష తోటలో భారీ దిగుబడిని సాధించి తోటి రైతుల దృష్టిని ఆకర్షిస్తున్నారు. ONBA (Organic Nutritional Bio-Agriculture) పద్ధతిని అనుసరిస్తూ సాగు చేపట్టి మంచి ఫలితాలు సాధించినట్లు ఆమె చెబుతున్నారు. కృష్ణవేణమ్మ తన పొలంలో దిల్ ఖుష్ రకం ద్రాక్ష సాగు చేస్తున్నారు. గతంలో ద్రాక్ష సాగులో నష్టాలను ఎదుర్కొన్న ఆమె.. సాగు విధానంలో మార్పులు చేయాలని నిర్ణయించుకున్నారు. ఈ క్రమంలో యూట్యూబ్‌లో వ్యవసాయానికి సంబంధించిన వీడియోలను చూస్తూ ONBA పద్ధతి గురించి తెలుసుకున్నారు. ఆ విధానంపై నమ్మకంతో సేంద్రీయ పోషకాల వినియోగాన్ని ప్రారంభించినట్లు ఆమె తెలిపారు.
భూమి, మొక్కల్లో మార్పు కనిపించిందంటున్న రైతు
ONBA పద్ధతిలో సేంద్రీయ పోషకాలను వినియోగించడం వల్ల తన తోటలో భూమి స్వభావంలో మార్పు కనిపించిందని కృష్ణవేణమ్మ చెబుతున్నారు. నేల గుల్లగా మారడంతో పాటు మొక్కల వేర్లు బలంగా పెరిగాయని, కాండం కూడా దృఢంగా తయారైందని ఆమె వివరించారు. యూరియా, డీఏపీ వంటి రసాయన ఎరువుల వినియోగం వల్ల నేల నాణ్యత దెబ్బతినే అవకాశం ఉందని ఆమె అభిప్రాయపడుతున్నారు. సేంద్రీయ పద్ధతుల ద్వారా భూమి సారాన్ని మెరుగుపరుచుకోవచ్చని తాను నమ్ముతున్నట్లు తెలిపారు.
1.5 ఎకరాల్లో 24.5 టన్నుల దిగుబడి
కృష్ణవేణమ్మ చెబుతున్న వివరాల ప్రకారం.. గత కోతలో తన 1.5 ఎకరాల ద్రాక్ష తోట నుంచి 24.5 టన్నుల దిగుబడి వచ్చింది. ఒక చెట్టుకు సుమారు 120 కిలోల వరకు ద్రాక్ష వచ్చినట్లు ఆమె తెలిపారు. ఈసారి సాగులో మరింత మెరుగైన దిగుబడి వస్తుందని ఆశిస్తున్నారు. ఈసారి ఒక్కో చెట్టుకు 150 కిలోలకు పైగా ద్రాక్ష దిగుబడి సాధించాలని లక్ష్యంగా పెట్టుకున్నట్లు కృష్ణవేణమ్మ చెబుతున్నారు. దిగుబడితో పాటు పంటకు మంచి ధర కూడా లభించడంతో తనకు సాగులో మరింత నమ్మకం పెరిగిందని ఆమె పేర్కొన్నారు.
పొరుగు రైతుల ఆసక్తి
కృష్ణవేణమ్మ సాధించిన ఫలితాలు చుట్టుపక్కల రైతులనూ ఆకర్షిస్తున్నాయి. ఆమె ద్రాక్ష తోటను సందర్శిస్తున్న రైతులు సాగు విధానం, ఉపయోగిస్తున్న సేంద్రీయ పోషకాలు, వాటి వినియోగం గురించి వివరాలు తెలుసుకుంటున్నారు. తాను అవని, పుడమి, కోకోలి వంటి ఉత్పత్తులను ఇతర రైతులకు కూడా సూచిస్తున్నానని కృష్ణవేణమ్మ తెలిపారు. ఆసక్తి ఉన్న రైతులు వాటిని ఉపయోగించి తమ పొలాల్లో ప్రయోగాలు చేస్తున్నారని ఆమె చెప్పారు.
పట్టుదల ఉంటే ఫలితం సాధ్యమే..
అనంతపురం వంటి కరువు ప్రభావిత ప్రాంతంలో ద్రాక్ష సాగు సవాళ్లతో కూడుకున్నదే. అయినప్పటికీ సరైన సాగు పద్ధతులు, నిరంతర పరిశీలన, అనుభవం, మార్గదర్శకత్వంతో మంచి ఫలితాలు సాధించవచ్చని కృష్ణవేణమ్మ తన అనుభవంతో చెబుతున్నారు. గతంలో నష్టాలను ఎదుర్కొన్నప్పటికీ వెనక్కి తగ్గకుండా కొత్త సాగు విధానాన్ని ప్రయత్నించడం.. ఇప్పుడు అదే తోటలో భారీ దిగుబడి రావడం ఆమె వ్యవసాయ ప్రయాణంలో ఆసక్తికరమైన మలుపుగా మారింది. కరువు నేలలోనూ కొత్త ఆలోచనతో ముందుకు సాగితే మంచి ఫలితాలు సాధించవచ్చని కృష్ణవేణమ్మ విజయగాథ చెబుతోంది.
