AP Social Media Influencer Policy: ఆంధ్రప్రదేశ్ ప్రభుత్వం సోషల్ మీడియా ఇన్‌ఫ్లుయెన్సర్లకు గుడ్న్యూస్ చెప్పింది. ముఖ్యమంత్రి నారా చంద్రబాబు నాయుడు అధ్యక్షతన జరిగిన కేబినెట్‌ సమావేశంలో ఇన్ఫ్లుయెన్సర్ పాలసీకి ఆమోదం లభించింది.. ఐదు రాష్ట్రాల్లో అమల్లో ఉన్న ఇన్ఫ్లుయెన్సర్ పాలసీలను పరిశీలించిన అనంతరం పారితోషికంపై నిర్ణయం తీసుకున్నట్లు.. కేబనెట్‌ సమావేశం తర్వాత మీడియాతో మాట్లాడిన మంత్రి కొలుసు పార్థసారథి వెల్లడించారు. ఆయా రాష్ట్రాల్లో ఇస్తున్న పారితోషికాలను పరిశీలించి, రాష్ట్రానికి అనుగుణంగా చెల్లింపులు నిర్ణయించినట్లు తెలిపారు.
ఫాలోవర్ల ఆధారంగా పారితోషికం
కొత్త పాలసీ ప్రకారం సోషల్ మీడియా ఇన్‌ఫ్లుయెన్సర్లకు వారి ఫాలోవర్ల సంఖ్య ఆధారంగా పారితోషికం చెల్లించనున్నారు. కొన్ని రాష్ట్రాల్లో ఇన్‌ఫ్లుయెన్సర్లకు ఎక్కువ మొత్తంలో పారితోషికం ఇస్తున్నట్లు మంత్రి పార్థసారథి తెలిపారు. కేటగిరీ–ఏలో ఉండాలంటే లక్షకు పైగా వ్యూస్‌ ఉండాలనే నిబంధనను కూడా పేర్కొన్నారు. లక్షకు పైగా ఫాలోవర్లు ఉన్న ఇన్‌ఫ్లుయెన్సర్లకు గరిష్టంగా రూ.15 వేల వరకు చెల్లించాలని ప్రభుత్వం నిర్ణయించింది. 50 వేల నుంచి 99,999 వరకు ఫాలోవర్లు ఉన్నవారికి రూ.7,500 అందించనున్నారు.
ఫాలోవర్ల కేటగిరీల వారీగా చెల్లింపులు
లక్షకు పైగా ఫాలోవర్లు ఉన్న ఇన్‌ఫ్లుయెన్సర్లకు గరిష్టంగా రూ.15 వేల వరకు చెల్లించాలని ప్రభుత్వం నిర్ణయించింది. 50 వేల నుంచి 99,999 వరకు ఫాలోవర్లు ఉన్నవారికి రూ.7,500 అందించనున్నారు. 25 వేల నుంచి 49,999 మంది వరకు ఫాలోవర్లు ఉన్న సోషల్ మీడియా ఇన్‌ఫ్లుయెన్సర్లకు రూ.5,000 చెల్లించనున్నారు. అలాగే 10 వేల నుంచి 24,999 మంది వరకు ఫాలోవర్లు ఉన్నవారికి రూ.2,500 వరకు చెల్లించాలని నిర్ణయించారు. ఈ మొత్తాలను అర్హత పొందిన ఇన్‌ఫ్లుయెన్సర్లకు వారి బ్యాంకు ఖాతాల్లో జమ చేయనున్నట్లు మంత్రి పార్థసారథి వెల్లడించారు. కొత్త పాలసీ ద్వారా ప్రభుత్వ కార్యక్రమాలు, విధానాలు, ప్రజలకు సంబంధించిన సమాచారాన్ని సోషల్ మీడియా వేదికగా విస్తృతంగా చేరవేసే అవకాశం కల్పించనున్నట్లు తెలిపారు.
