ఆంధ్రప్రదేశ్ రాజకీయాలకు గుండెకాయ లాంటి విజయవాడ కార్పొరేషన్ మేయర్ పీఠం కోసం అప్పుడే హైఓల్టేజ్ రాజకీయం మొదలైంది. రాష్ట్ర ప్రభుత్వం మేయర్ల ఎంపికను ‘ప్రత్యక్ష ఎన్నికల’ ద్వారా నిర్వహించాలని నిర్ణయించడంతో.. ఆశావహుల సంఖ్య భారీగా పెరిగింది. ముఖ్యంగా తెలుగుదేశం పార్టీ నేతృత్వంలోని కూటమిలో టికెట్ కోసం సామాజిక వర్గాల వారీగా తీవ్రస్థాయిలో ఒత్తిడి పెరుగుతోంది. బెజవాడ మేయర్ సీటును తమకే కేటాయించాలంటూ అటు కమ్మ, ఇటు కాపు సామాజిక వర్గాల నేతలు పట్టుబడుతుండటంతో ఉత్కంఠ నెలకొంది.
విజయవాడ రాజకీయాలలో మొదటి నుంచి కమ్మ, కాపు సామాజిక వర్గాల ప్రభావం అత్యంత కీలకంగా ఉంటూ వస్తోంది. అయితే, తెలుగుదేశం పార్టీకి గతంలో విజయవాడలో బీసీ సామాజిక వర్గాలకు మేయర్ పీఠం అప్పగించిన చారిత్రక నేపథ్యం ఉంది. దీంతో ఈసారి కూడా 33.33 శాతం బీసీ రిజర్వేషన్ల కోటా నేపథ్యంలో బీసీ నేతలు కూడా రేసులోకి దూసుకొస్తున్నారు. దీనికి తోడు, ఈసారి విజయవాడ నగరంలో గణనీయమైన ఓటు బ్యాంక్ కలిగిన ముస్లిం మైనారిటీ వర్గాలు సైతం తమకు మేయర్ పదవిలో ప్రాధాన్యత కల్పించాలని, ముస్లిం అభ్యర్థిని బరిలోకి దించాలని గట్టిగా డిమాండ్ చేస్తుండటంతో సమీకరణాలు ఆసక్తికరంగా మారాయి.
ప్రస్తుతం కూటమిలో సీట్ల సర్దుబాటుపై ఉత్కంఠ కొనసాగుతుండగానే, జనసేన పార్టీల నుంచి సుమారు 20 మందికి పైగా కీలక నేతలు ఈ పీఠంపై కన్నేసారు. గద్దె అనురాధ, దేవినేని అపర్ణ, బోండా సిద్ధార్థ్, కొమ్మారెడ్డి పట్టాభిరామ్ వంటి కమ్మ నేతలతో పాటు వంగవీటి రాధా పేరు కూడా కాపు సమీకరణాలలో బలంగా వినిపిస్తోంది. మరోవైపు, బీసీ ప్రతినిధులుగా ఎర్రబోతు రమణారావు వంటి వారు తమ ప్రయత్నాలు ముమ్మరం చేశారు. అన్ని వర్గాల నుంచి వస్తున్న విజ్ఞప్తుల నేపథ్యంలో సీఎం చంద్రబాబు నాయుడు, పవన్ కళ్యాణ్ సామాజిక సమతుల్యత దెబ్బతినకుండా ఎవరిని ఖరారు చేస్తారనేది బెజవాడ పాలిటిక్స్‌లో ఇప్పుడు అత్యంత ఉత్కంఠ రేపుతోంది.
The post మేయర్ కోసం బెజవాడ కూటమిలో కులాల లొల్లి..! appeared first on Telugu Rajyam.
