Dasara Festival 2026 : దసరా సనాతన ధర్మంలోని ముఖ్యమైన పండుగలలో ఒకటి. చెడుపై మంచి, అధర్మంపై ధర్మం సాధించిన విజయానికి ప్రతీకగా ఈ పండుగను జరుపుకుంటారు. విజయదశమి అని కూడా పిలిచే ఈ పర్వదినాన్ని ప్రతి సంవత్సరం ఆశ్వయుజ మాసంలోని శుక్ల పక్ష దశమి తిథి నాడు జరుపుకుంటారు. అయితే, ఈ ఏడాది 20వ తేదీన దసరా పండుగను జరుపుకుంటారు. ఈ పండుగ రోజున విజయ ముహూర్తంలో ఏ కార్యక్రమం తలపెట్టినా విజయాలను పొందుతారని విశ్వాసం.
Also Read : Dasara Festival 2026 : దసరా రోజున విజయ ముహూర్తం ఎప్పుడు..? ఆ సమయంలో ఇలాచేస్తే అద్భుత ఫలితాలు
జీవితంలో ఎదురవుతున్న బాధల నుంచి ఉపశమనం పొందేందుకు దసరా పండుగ రోజున అనేక మంది పలు పరిహారాలు నిర్వహిస్తుంటారు. అయితే, ఈ దసరా పండుగ రోజున మూడు ప్రత్యేక పరిహారాలు నిర్వహిస్తే ధనం బాధలు తొలగిపోతాయని.. విజయాలు చేకూరుతాయని.. ప్రశాంతత లభిస్తుందని పలువురు పండితులు చెబుతున్నారు. వాటి వివరాలు ఇక్కడ తెలుసుకుందాం.
జమ్మి చెట్టు పరిహారం (ధనాభివృద్ధి కోసం) : ధనాభివృద్ధికోసం ఈ దసరా పండుగ రోజున జమ్మి చెట్టు పరిహారం చేస్తే ఎంతో మేలు చేస్తుందని పలువురు పండితులు చెబుతున్నారు. ముందుగా.. విజయదశమి రోజు సాయంత్రం జమ్మి చెట్టు (శమీ వృక్షం) దగ్గరికి వెళ్లి ప్రదక్షిణలు చేయాలి. నెయ్యి దీపం వెలిగించి.. ఆ తరువాత ‘శమీ శమయతే పాపం శమీ శత్రు వినాశనీ’.. అనే శ్లోకాన్ని మనసులో తలచుకోవాలి. పూజ చేసిన తరువాత కొన్ని జమ్మి ఆకులను తెచ్చి మీ ఇంట్లోని పూజా గదిలో లేదంటే డబ్బులు దాచే బీరువాలో పెట్టుకోవాలి. ఈ పరిహారం వల్ల ధనాభివృద్ధి కలుగుతుంది. లక్ష్మీ కటాక్షం వల్ల ఆర్థిక ఇబ్బందులు తగ్గుతాయని చెబుతున్నారు.
అపరాజతా దేవి పూజ (విజయం కోసం) : దసరా రోజున అపరాజతా దేవి పూజ చేయడం ద్వారా మన వృత్తిలో విజయాలు సిద్ధిస్తాయని, మనం తలపెట్టిన పనులు విజయవంతంగా పూర్తవుతాయని కొందరు పండితులు చెబుతున్నారు. ఈ పరిహారం చేయాలంటే.. దసరా రోజున మధ్యాహ్నం లేదంటే సాయంత్రం వేళల్లో మీ ఇంటి ఈశాన్య మూలను శుభ్రం చేయండి అమ్మవారి దుర్గా రూపమైన అపరాజతా దేవిని మనసులో ధ్వనించండి. వీలైతే నీలి రంగు శంఖం పువ్వులతో అమ్మవారికి అర్చన చేయండి. ఇలా చేయండ వల్ల చేసే ప్రతి పనిలో విజయం కలుగుతుందని సంప్రదాయ విశ్వాసం. శత్రు బాధలు తగ్గి, కొత్త పనుల్లో శుభఫలితాలు కలుగుతాయని నమ్ముతారు.
రాతి ఉప్పు పరిహారం (ఇంట్లో ప్రశాంతత కోసం) : దసరా పండుగ రోజున రాతి ఉప్పు పరిహారం చేస్తే ఇంట్లో ప్రశాంతత నెలకొంటుంది. ఇందుకోసం.. దసరా పండుగ రోజు రాత్రి ఇల్లు మొత్తం శుభ్రం చేసుకోవాలి. ఒక చిన్ని గాజు గిన్నెను తీసుకొని అందులో రెండు కప్పులు రాతి ఉప్పు వేయండి. దానిపై 4 లవంగాలు ఉంచండి. ఈ గిన్నెను మీ ఇంటి నైరుతి మూలలో ఎవరికి తగలకుండా పెట్టుకోవాలి. ఇలా చేయడం వల్ల ఇంట్లోని ప్రతికూల శక్తులు, నరదృష్టి తొలగి ప్రశాంతత లభిస్తుందని నమ్మకం. ఇంట్లో సానుకూల శక్తి పెరిగి.. లక్ష్మిదేవి స్థిర నివాసం ఏర్పర్చుకుంటుందని భావిస్తారు.
గమనిక : ఈ పరిహారాలను 10టీవీ ధృవీకరించడం లేదు. కేవలం కొందరు పండితులు సూచనలను పరిగణలోకి తీసుకొని మాత్రమే ఈ కథనాన్ని ప్రచురించడం జరిగింది. ఈ పరిహారాలను ఆచరించే ముందు మీకు తెలిసిన పండితుల అభిప్రాయాలు తీసుకోవాలని సూచన.
