Heavy Rain Alert: ఆంధ్రప్రదేశ్ తీరం వైపు వేగంగా దూసుకొస్తుంది వాయుగుండం.. దీంతో అప్రమత్తమైన అధికార యంత్రాంగం.. ముందస్తు చర్యలు చేపడుతున్నారు.. వాయుగుండం ప్రభావంతో శ్రీకాకుళం జిల్లా అప్రమత్తమైంది. తీవ్ర వర్షాలు, ఈదురు గాలుల నేపథ్యంలో ప్రజల భద్రత దృష్ట్యా అధికారులు ముందస్తు చర్యలు చేపట్టారు. శ్రీకాకుళం పట్టణంలోని పలు ప్రాంతాల్లో విద్యుత్ సరఫరాను తాత్కాలికంగా నిలిపివేశారు. దీంతో పట్టణం అంధకారంలో మునిగిపోయింది. విద్యుత్ తీగలు తెగిపోవడం, స్తంభాలు దెబ్బతినడం వంటి ప్రమాదాలు జరగకుండా ఉండేందుకు ఈ నిర్ణయం తీసుకున్నట్లు అధికారులు తెలిపారు. వాతావరణ పరిస్థితులు సాధారణ స్థితికి చేరుకున్న తర్వాత దశలవారీగా విద్యుత్ సరఫరాను పునరుద్ధరిస్తామని పేర్కొన్నారు. అవసరం లేకుండా ప్రజలు ఇళ్ల నుంచి బయటకు రావొద్దని, అత్యవసర పరిస్థితుల్లో మాత్రమే ప్రయాణాలు చేయాలని అధికారులు సూచించారు. వాయుగుండం ప్రభావం కొనసాగుతున్న నేపథ్యంలో జిల్లా యంత్రాంగం పరిస్థితిని ఎప్పటికప్పుడు పర్యవేక్షిస్తోంది.
