Hyderabad: హైదరాబాద్‌లో గణేష్ నిమజ్జన బందోబస్తు విధుల్లో విషాద ఘటన చోటుచేసుకుంది. నెక్లెస్ రోడ్‌లో గుర్తుతెలియని ద్విచక్ర వాహనం ఢీకొనడంతో తీవ్రంగా గాయపడిన ఎస్ఐ చికిత్స పొందుతూ మృతిచెందారు. ఈ ఘటన అర్ధరాత్రి సమయంలో చోటుచేసుకుంది.
భద్రాద్రి కొత్తగూడెం జిల్లాకు చెందిన వెంకన్న కొత్తగూడెం 2 టౌన్ పోలీస్ స్టేషన్‌లో ఎస్ఐగా విధులు నిర్వహిస్తున్నారు. గణేష్ నిమజ్జనం సందర్భంగా బందోబస్తు విధుల కోసం ఆయన హైదరాబాద్‌కు వచ్చారు. ఈ క్రమంలో నిన్న అర్ధరాత్రి తర్వాత సుమారు 2 గంటల సమయంలో నెక్లెస్ రోడ్‌లో గుర్తుతెలియని ద్విచక్ర వాహనం వెంకన్నను ఢీకొట్టింది.
ఈ ప్రమాదంలో ఎస్ఐ వెంకన్నకు తీవ్ర గాయాలయ్యాయి. కుటుంబ సభ్యులు ఆయనను వరంగల్‌లోని ఎంజీఎం ఆస్పత్రికి తరలించి చికిత్స అందించారు. అయితే పరిస్థితి విషమించడంతో చికిత్స పొందుతూ వెంకన్న మృతిచెందారు. ఘటనపై పోలీసులు కేసు నమోదు చేసి దర్యాప్తు చేస్తున్నారు. ప్రమాదానికి కారణమైన గుర్తుతెలియని ద్విచక్ర వాహనాన్ని గుర్తించేందుకు పోలీసులు ప్రయత్నిస్తున్నారు. గణేష్ నిమజ్జన బందోబస్తు విధుల్లో ఉన్న ఎస్ఐ మృతిచెందడంతో పోలీసు వర్గాల్లో విషాదం నెలకొంది.
