భారత విమానయాన రంగానికి ఎదురవుతున్న అంతర్జాతీయ ఇబ్బందులను అధిగమించడానికి కేంద్ర ప్రభుత్వం సరికొత్త దౌత్య వ్యూహాన్ని అమలు చేస్తోంది. పాకిస్థాన్ తమ గగనతలాన్ని భారత విమానాలకు పూర్తిగా నిషేధించడంతో.. దానికి ప్రత్యామ్నాయంగా చైనా గగనతలాన్ని ఉపయోగించుకునేందుకు ఢిల్లీ చర్చలు జరుపుతోంది. చైనాలోని జింజియాంగ్ ప్రాంతానికి చెందిన గగనతలాన్ని భారత విమానాల రవాణా కోసం వినియోగించుకునేలా రెండు దేశాల మధ్య చర్చలు తుది దశకు చేరుకున్నట్లు సమాచారం.
న్యూఢిల్లీలో జరిగిన బ్రిక్స్ సదస్సుకు చైనా అధ్యక్షుడు షీ జిన్‌పింగ్ హాజరైన కొద్ది రోజుల్లోనే ఈ కీలక పరిణామం వెలుగులోకి రావడం గమనార్హం. జింజియాంగ్ లోని హోటాన్ మీదుగా భారత విమానాలను నడిపేందుకు గత ఏడాది కాలంగా భారత విదేశాంగ మంత్రిత్వ శాఖ చైనా అధికారులతో నిరంతరం సంప్రదింపులు జరుపుతోంది. 2025 ఏప్రిల్ లో జరిగిన పహల్గామ్ ఉగ్రదాడి తర్వాత భారత్, పాకిస్థాన్ మధ్య సైనిక ఉద్రిక్తతలు పెరగడంతో.. పాక్ తన గగనతలాన్ని భారత విమానాలకు పూర్తిగా మూసివేసింది.
ఇటీవల ఆ నిషేధాన్ని మరో నెల రోజులు పొడిగించడంతో భారత్ ఈ ప్రత్యామ్నాయ మార్గంపై స్పీడ్ పెంచింది. మరోవైపు ఇరుదేశాల మధ్య దౌత్య సంబంధాలు మెరుగుపడుతున్న నేపథ్యంలో డైరెక్ట్ విమాన సర్వీసులు కూడా జోరందుకున్నాయి. చైనా సదరన్ ఎయిర్‌లైన్స్ ఆరేళ్ల విరామం తర్వాత గ్వాంగ్‌జౌ మరియు న్యూఢిల్లీ మధ్య నేరుగా విమాన సర్వీసులను పునరుద్ధరించింది. భారత విమానయాన సంస్థ ఇండిగో సైతం గ్వాంగ్‌జౌ నగరానికి కలకత్తా, ఢిల్లీ నుంచి ఇప్పటికే విమానాలను నడుపుతోంది.
ఎయిర్ ఇండియా కూడా ఢిల్లీ నుంచి షాంఘై నగరానికి తన సర్వీసులను పునఃప్రారంభించింది. పాకిస్థాన్ గగనతల నిషేధం వల్ల భారత విమానాలు సుదీర్ఘ మార్గాల్లో ప్రయాణించాల్సి వస్తోంది. ఒకవేళ చైనా జింజియాంగ్ మార్గానికి గ్రీన్ సిగ్నల్ ఇస్తే.. భారత విమానాలకు ప్రయాణ సమయం తగ్గడంతో పాటు ఇంధన ఖర్చులు కూడా భారీగా కలిసివచ్చే అవకాశం ఉందని విమానయాన నిపుణులు భావిస్తున్నారు.
The post చైనాకు దగ్గరవుతోన్న భారత్..? appeared first on Telugu Rajyam.
