AP Rains Alert : ఏపీలో వర్షాలు దంచికొడుతున్నాయి. బంగాళాఖాతంలో ఏర్పడిన తీవ్ర వాయుగుండం కారణంగా గత నాలుగు రోజులుగా రాష్ట్రంలోని పలు ప్రాంతాల్లో భారీ నుంచి అతిభారీ వర్షాలు కురిశాయి. వాయుగుండం తీరం దాటడంతో ప్రస్తుతం వర్షాలు తగ్గుముఖం పట్టాయి. అయితే, వర్షాలపై తాజాగా వాతావరణ శాఖ కీలక అప్డేట్ ఇచ్చింది. నేడు (ఆదివారం) పలు జిల్లాల్లో మోస్తరు నుంచి భారీ వర్షాలు కురుస్తాయని వాతావరణ శాఖ అధికారులు హెచ్చరికలు జారీ చేశారు. పిడుగులు, ఈదురుగాలులతో కూడిన వర్షాలు కురుస్తాయని, ప్రజలు అప్రమత్తంగా ఉండాలని సూచించారు.
ఏపీ విపత్తుల నిర్వహణ సంస్థ తెలిపిన వివరాల ప్రకారం.. ఏపీలో ఇవాళ శ్రీకాకుళం, అల్లూరి సీతారామరాజు, పోలవరం జిల్లాల్లో అక్కడక్కడ పిడుగులతో కూడిన మోస్తరు నుంచి భారీ వర్షాలు కురుస్తాయని తెలిపింది. గత నాలుగు రోజులుగా కురిసన వర్షాల కారణంగా రాష్ట్రంలోని పలు ప్రాంతాల్లో నదులు, వాగులు, పొంగిపొర్లుతున్నాయి. ఈ క్రమంలో వాగులు, కాజ్‌వేలు దాటే క్రమంలో ప్రజలు, ప్రయాణికులు జాగ్రత్తలు తీసుకోవాలని.. వరద నీటి ప్రవాహం ఎక్కువగా ఉంటే వాగులు, కాజ్‌వేలు దాటొద్దని అధికారులు సూచించారు.
మరోవైపు ఎగువ రాష్ట్రాల్లో కురుస్తున్న వర్షాల కారణంగా గోదావరి నదికి స్వల్ప వరద పెరుగుతోందని ఏపీ విపత్తుల నిర్వహణ సంస్థ ఎండీ ప్రఖర్ జైన్ తెలిపారు. ధవళేశ్వరం బ్యారేజి వద్ద ఇన్ ఫ్లో/ఔట్ ఫ్లో 5.19 లక్షల క్యూసెక్కులు కాగా.. ఆదివారం వరద ప్రవాహం 8 నుంచి 9లక్షల క్యూసెక్కులకు చేరే అవకాశం ఉందని, ఆ తరువాత క్రమంగా తగ్గుముఖం పట్టే అవకాశం ఉందని అంచనా వేశారు.
వర్షాలు, ఈదురుగాలుల సమయంలో ప్రజలు జాగ్రత్తలు తీసుకోవాలని అధికారులు సూచించారు. వర్షాలు, ఈదురుగాలుల సమయంలో చెట్ల కింద, విద్యుత్ స్తంభాలు, హోర్డింగ్ లు ఉన్న ప్రాంతాల్లో ఉండొద్దని, సురక్షిత ప్రాంతాలకు వెళ్లాలని సూచించారు.
