Vikarabad: వికారాబాద్ జిల్లా పరిగిలోని గణేష్ నిమజ్జన ఊరేగింపులో తీవ్ర కలకలం రేగింది. బందోబస్తు విధులు నిర్వహిస్తున్న ఒక పోలీస్ కానిస్టేబుల్‌పై తరుణ్ అనే యువకుడు కత్తితో దాడికి పాల్పడ్డాడు. వివరాల్లోకి వెళ్తే.. పరిగిలోని అయోధ్య యువజన సంఘం ఆధ్వర్యంలో ఏర్పాటు చేసిన గణేష్ విగ్రహాన్ని నిమజ్జనం కోసం నిర్వాహకులు ఊరేగింపుగా తీసుకుని వెళ్తున్నారు. ఈ క్రమంలో మద్యం మత్తులో ఉన్న తరుణ్ అనే యువకుడిని “తమ గణేష్ విగ్రహం దగ్గరకు రావద్దు” అని నిర్వాహకులు హెచ్చరించి అక్కడి నుంచి పంపించివేశారు.
తననే రావద్దంటారా అని తీవ్ర ఆగ్రహానికి గురైన తరుణ్, మద్యం మత్తులో విగ్రహాన్ని తరలిస్తున్న ట్రాక్టర్ తాళం చెవిని లాక్కున్నాడు. దీంతో ట్రాక్టర్ తాళం లాక్కోవడంపై గణేష్ ఉత్సవ నిర్వాహక యువకులకు, తరుణ్‌కు మధ్య తీవ్రస్థాయిలో గొడవ జరిగింది. ఈ గొడవలో తరుణ్ తన వెంట తెచ్చుకున్న కత్తితో యువకులపై దాడి చేయడానికి ప్రయత్నించాడు. అది గమనించి గొడవను సర్దుమణిగించేందుకు అడ్డువెళ్లిన కానిస్టేబుల్ నరసింహులుపై కత్తితో దాడి చేశాడు. కానిస్టేబుల్‌కు ఎడమ వైపు కడుపు భాగంలో తీవ్ర గాయమైంది. వెంటనే పోలీసులు గొడవ పడుతున్న యువకులను చెదరగొట్టి, కత్తి గాయమైన కానిస్టేబుల్ నరసింహులును పరిగి ప్రభుత్వ ఆసుపత్రికి తరలించారు. అక్కడ ప్రాథమిక చికిత్స అందించిన అనంతరం మెరుగైన వైద్యం కోసం హైదరాబాద్‌లోని కాంటినెంటల్ ఆసుపత్రికి తరలించారు. ఈ ఘటన తెల్లవారుజామున 4 గంటల ప్రాంతంలో పరిగిలోని వివేకానంద విగ్రహం వద్ద చోటుచేసుకుంది. దాడికి పాల్పడ్డ నిందితుడు తరుణ్‌ను అదుపులోకి తీసుకున్న పోలీసులు, అతడి వద్ద నుంచి కత్తిని స్వాధీనం చేసుకుని కేసు నమోదు చేశారు.
