ఆంధ్రప్రదేశ్‌లో కూటమి ప్రభుత్వం అధికారంలోకి వచ్చిన తర్వాత త్వరలో జరగబోయే మున్సిపల్ కార్పొరేషన్ ఎన్నికలపై ఇరు పార్టీలు ప్రత్యేక దృష్టి సారించాయి. ముఖ్యంగా ప్రతిష్ఠాత్మకమైన విజయవాడ, గుంటూరు కార్పొరేషన్లను కైవసం చేసుకోవాలని కూటమి భావిస్తోంది. అయితే, పొత్తుల సమీకరణాల్లో భాగంగా జనసేనాని పవన్ కళ్యాణ్ సరికొత్త ప్రతిపాదనను టీడీపీ ముందు ఉంచినట్లు సమాచారం. జనసేనకు బలమైన క్యాడర్, సామాజికవర్గ మద్దతు ఉన్న గుంటూరు కార్పొరేషన్ మేయర్ స్థానాన్ని తమకు కేటాయించాలని, దానికి బదులుగా విజయవాడ మేయర్ స్థానాన్ని పూర్తిగా టీడీపీకే వదిలేస్తామని పవన్ ప్రతిపాదించినట్లు తెలుస్తోంది. గుంటూరులో జనసేన జెండా ఎగరేయాలన్నది పవన్ కళ్యాణ్ ప్లాన్.
పవన్ కళ్యాణ్ ప్రపోజల్‌కు గుంటూరు పార్లమెంట్ సభ్యుడు, కేంద్ర సహాయ మంత్రి డాక్టర్ పెమ్మసాని చంద్రశేఖర్ గట్టిగా బ్రేక్ వేస్తున్నట్లు సమాచారం. గుంటూరు కార్పొరేషన్ పరిధిలో తెలుగుదేశం పార్టీకి సాంప్రదాయకంగా బలమైన ఓటు బ్యాంక్ ఉందని, అసెంబ్లీ ఎన్నికల్లో క్లీన్ స్వీప్ చేసిన తాము మేయర్ పీఠాన్ని జనసేనకు ఎలా ఇస్తామని పెమ్మసాని ప్రశ్నిస్తున్నట్లు తెలుస్తోంది. గుంటూరు మున్సిపల్ పీఠాన్ని వేరే పార్టీకి ఇస్తే ఇక్కడి టీడీపీ క్యాడర్ నిరుత్సాహపడుతుందని, కాబట్టి గుంటూరు మేయర్ అభ్యర్థిగా టీడీపీ నేతనే బరిలోకి దించాలని ఆయన పట్టుబడుతున్నట్లు టాక్.
మరోవైపు, పవన్ ప్రతిపాదన ప్రకారం విజయవాడ మేయర్ స్థానం టీడీపీకి దక్కుతున్నప్పటికీ.. ఇక్కడి సమీకరణాలపై విజయవాడ ఎంపీ కేశినేని శివనాథ్ కూడా అసంతృప్తితో ఉన్నట్లు విశ్లేషకులు చెబుతున్నారు. బెజవాడలో జనసేనకు కూడా గట్టి పట్టుంది. పొత్తులో భాగంగా విజయవాడను పూర్తిగా టీడీపీకి ఇచ్చేసి, గుంటూరును జనసేనకు కేటాయిస్తే.. రాబోయే రోజుల్లో రెండు జిల్లాల పరిధిలో ఇరు పార్టీల మధ్య అంతర్గత సమన్వయం దెబ్బతినే ప్రమాదం ఉందనేది కొందరి వాదన. మేయర్ స్థానాల మార్పిడి కంటే.. రెండు చోట్లా గెలిచే డివిజన్ల ఆధారంగానే పంపకాలు ఉండాలని స్థానిక తమ్ముళ్లు కోరుకుంటున్నారు.
జనసేన అధినేత పవన్ కళ్యాణ్ ప్రతిపాదన, దానికి స్థానిక ఎంపీలు పెమ్మసాని, కేశినేని చిన్నిల నుంచి వ్యక్తమవుతున్న అభ్యంతరాలతో ఈ వ్యవహారం ఇప్పుడు కూటమి పెద్దలకు పెద్ద సవాలుగా మారింది. స్థానిక సంస్థల ఎన్నికల నాటికి ఈ విభేదాలు మరింత ముదరకుండా ఉండాలంటే టీడీపీ అధినేత, సీఎం చంద్రబాబు నాయుడు స్వయంగా రంగంలోకి దిగక తప్పేలా లేదు. మరి పవన్ కళ్యాణ్ అడిగినట్లు గుంటూరు మేయర్ పీఠాన్ని జనసేనకు ఇస్తారా..? లేక పెమ్మసాని అభ్యంతరాల మేరకు పాత పద్ధతిలోనే సీట్ల సర్దుబాటు జరుగుతుందా అనేది తేలాల్సి ఉంది.
The post పవన్ ప్రపోజల్ కు టీడీపీ ఎంపీల బ్రేక్..? appeared first on Telugu Rajyam.
