Hyrox | ఫిట్‌నెస్‌పై ఆసక్తి పెరుగుతున్న నేపథ్యంలో ప్రస్తుతం హైరోక్స్ (HYROX) వంటి అధిక తీవ్రత కలిగిన వ్యాయామ విధానాలు ప్రాచుర్యం పొందుతున్నాయి. ఇది సాధారణ జిమ్‌ వ్యాయామాలు లేదా కేవలం రన్నింగ్‌కు భిన్నంగా ఉంటుంది. ఇందులో పరుగు, కండరాల బలం, శారీరక సామర్థ్యాన్ని పరీక్షించే వ్యాయామాలను కలిపి చేస్తారు. సాధారణంగా ఎనిమిది కిలోమీటర్ల పరుగు మధ్యలో ఎనిమిది రకాల వ్యాయామాలను చేయాల్సి ఉంటుంది. స్కీఎర్గ్‌, స్లెడ్‌ పుష్‌, స్లెడ్‌ పుల్‌, బర్పీ బ్రాడ్‌ జంప్స్‌, రోయింగ్‌, ఫార్మర్స్‌ క్యారీ, సాండ్‌బ్యాగ్‌ లంజెస్‌, వాల్‌ బాల్స్‌ ఇందులో ఉంటాయి. ప్రతి దశలో శరీరంపై భిన్నమైన ఒత్తిడి పడడంతో గుండె సామర్థ్యంతో పాటు కండరాల బలం, సహనశక్తి కూడా పరీక్షకు గురవుతాయి.
శరీరానికి తీవ్రమైన సవాలు..
హైరోక్స్‌లో పరుగు, బలవర్ధక వ్యాయామాలు ఒకదాని తర్వాత మరొకటి చేయాల్సి రావడం వల్ల శరీరానికి తీవ్రమైన సవాలు ఎదురవుతుంది. పరుగు గుండె వేగాన్ని పెంచి శ్వాసకోశ సామర్థ్యాన్ని పరీక్షిస్తే, ఇతర వ్యాయామాలు కండరాల బలం, చురుకుదనం, సహనశక్తిని ఉపయోగించుకునేలా చేస్తాయి. ఈ రెండింటి కలయిక వల్ల పోటీ చివరి దశల్లో తీవ్ర అలసట ఏర్పడే అవకాశం ఉంటుంది. ముఖ్యంగా అలసట పెరిగినప్పుడు వ్యాయామం చేసే విధానంలో పొరపాట్లు జరిగితే కండరాలు పట్టేయడం, కీళ్ల బెణుకులు, నడుము గాయాలు వంటి సమస్యలు తలెత్తుతాయి. అధికంగా శ్రమించడం వల్ల తీవ్రమైన అలసట, వేడి సంబంధిత అనారోగ్యాలు, ఎక్కువకాలం కొనసాగే శారీరక అలసట వంటి సమస్యలు కూడా ఎదురయ్యే అవకాశం ఉంటుంది.
అందరికీ స‌రిపోతుందా..
అయితే హైరోక్స్ అందరికీ ఒకే విధంగా సరిపోదు. సాధారణంగా వ్యాయామానికి అలవాటు లేని వారు లేదా శారీరక సామర్థ్యం ఇంకా అభివృద్ధి చెందని వారు నేరుగా అధిక తీవ్రత కలిగిన ఈ విధానాన్ని ప్రారంభించడం సరికాదు. తీవ్రమైన గుండె సంబంధిత సమస్యలు ఉన్నవారు, నియంత్రణలో లేని కీళ్ల లేదా శరీర నిర్మాణ సంబంధిత గాయాలు ఉన్నవారు, ఇప్పటికే ఇతర ఆరోగ్య సమస్యలతో బాధపడుతున్నవారు ప్రత్యేక జాగ్రత్తలు తీసుకోవాలి. చాలాకాలంగా వ్యాయామం చేయని వారు కూడా ముందుగా తమ శారీరక సామర్థ్యాన్ని పెంచుకుని, అవసరమైతే వైద్యుడు లేదా శిక్షకుడి సలహాతోనే ప్రారంభించడం మంచిది. వ్యాయామం సమయంలో ఛాతీలో నొప్పి, ఊహించని శ్వాస తీసుకోవడంలో ఇబ్బంది, తల తిరగడం, స్పృహ కోల్పోవడం లేదా గుండె కొట్టుకునే విధానంలో అసాధారణ మార్పులు కనిపిస్తే వెంటనే వ్యాయామాన్ని ఆపాలి.
ముందస్తు సిద్ధత ఉండాలి..
హైరోక్స్ వంటి అధిక తీవ్రత కలిగిన వ్యాయామాలను సురక్షితంగా చేయాలంటే ముందస్తు సిద్ధత చాలా ముఖ్యం. వ్యాయామానికి ముందు శరీరాన్ని సిద్ధం చేసే వార్మప్‌, పూర్తయిన తర్వాత కూల్‌డౌన్‌ చేయాలి. తగినంత నీరు తాగుతూ శరీరంలో ద్రవాల లోటు రాకుండా చూసుకోవాలి. శరీరం తీవ్రంగా అలసిపోయినప్పుడు లేదా నొప్పి వచ్చినప్పుడు బలవంతంగా కొనసాగించకుండా విశ్రాంతి తీసుకోవాలి. సరైన పాదరక్షలు, అనువైన దుస్తులు ఉపయోగించడం కూడా గాయాల ప్రమాదాన్ని తగ్గించడంలో సహాయపడుతుంది. హైరోక్స్ కొత్తగా ప్రారంభించేవారు తక్కువ తీవ్రతతో మొదలుపెట్టి, శారీరక సామర్థ్యం పెరిగే కొద్దీ క్రమంగా తీవ్రతను పెంచడం ద్వారా ఈ వ్యాయామ విధానాన్ని మరింత సురక్షితంగా కొనసాగించవచ్చ‌ని నిపుణులు చెబుతున్నారు.
