ములుగు, వెలుగు : పోక్సో కేసులో నిందితుడికి 20 ఏండ్ల కఠిన కారాగార శిక్ష విధిస్తూ జిల్లా జడ్జి తీర్పు వెలువరించారు. అందుకు సంబంధించిన వివరాలను ఎస్పీ సుధీర్ రాంనాథ్ కేకన్ మీడియాకు వివరించారు. ములుగు జిల్లా మంగపేట మండలానికి చెందిన మాతూరి రమేశ్ 2020లో మైనర్ బాలికపై అత్యాచారానికి పాల్పడటంతో కుటుంబ సభ్యులు ఇచ్చిన ఫిర్యాదు మేరకు అప్పటి ఎస్సై శ్రీనివాస్ పోక్సో చట్టం కింద కేసు నమోదు చేసి నిందితుడిని కోర్టులో హాజరు పరిచారు.
శుక్రవారం విచారణలో దోషిగా తేలడంతో జడ్జి సూర్య చంద్రకళ నిందితుడు మాతూరి రమేశ్కు 20 ఏండ్ల కఠిన కారాగార శిక్షతోపాటు రూ.8,500 జరిమానా విధించారు. కేసులో బాధితురాలికి రూ.10 లక్షల పరిహారం చెల్లించాలని కోర్టు ఆదేశించింది.
కేసు పరిష్కారంతోపాటు నిందితుడికి శిక్షపడేలా సాక్ష్యాలు ప్రవేశపెట్టిన ఏఎస్పీ మనన్ భట్, సీఐ సూర్యప్రకాశ్, ఎస్సై టీవీ సూరి, కోర్టు మానిటరింగ్ ఆఫీసర్ డీఎస్పీ కిషోర్, లైజనింగ్ అధికారి, ఏఎస్సై కుమారస్వామి, సీడీవోలు మైనిక, మంగీలాల్ ను ఎస్పీ అభినందించారు.
