Atchannaidu: రాష్ట్రంలో తీవ్ర వాయుగుండం కారణంగా కురిసిన భారీ వర్షాలు మరియు ఈదురుగాలుల వల్ల నష్టపోయిన పంటల వివరాలను వెంటనే సేకరించాలని ఆంధ్రప్రదేశ్ వ్యవసాయ శాఖ మంత్రి కింజరాపు అచ్చెన్నాయుడు అధికారులను ఆదేశించారు. అదేవిధంగా, వర్షాల వల్ల దెబ్బతిన్న రోడ్లు, ఇతర మౌలిక వసతుల పునరుద్ధరణ పనులను అత్యవసర ప్రాతిపదికన పూర్తి చేయాలని స్పష్టం చేశారు. క్షేత్రస్థాయిలో రైతులకు, ప్రజలకు ఎటువంటి అసౌకర్యం కలగకుండా అన్ని ప్రభుత్వ శాఖలు పరస్పర సమన్వయంతో అప్రమత్తంగా వ్యవహరించాలని ఆయన సూచించారు.
టెలీకాన్ఫరెన్స్ ద్వారా జిల్లాల సమీక్ష
ఈ నేపథ్యంలో ఉన్నతాధికారులతో శుక్రవారం మంత్రి ప్రత్యేకంగా టెలీకాన్ఫరెన్స్ నిర్వహించారు. వ్యవసాయ శాఖ ప్రత్యేక ప్రధాన కార్యదర్శి బూడితి రాజశేఖర్‌తో పాటు పార్వతీపురం మన్యం, డా. బి.ఆర్‌. అంబేద్కర్‌ కోనసీమ, శ్రీకాకుళం జిల్లాల కలెక్టర్లతో ఆయన మాట్లాడారు. వ్యవసాయ, ఉద్యానవన పంటలకు జరిగిన నష్టంపై తక్షణమే క్షేత్రస్థాయి సర్వే చేపట్టి, నివేదికలను వేగంగా సిద్ధం చేయాలని ఆదేశించారు. పొలాల్లో నిలిచిపోయిన నీటిని బయటకు పంపడం, అధిక తేమతో పంటలు పాడవకుండా రైతులకు తగిన సాంకేతిక సలహాలు అందించాలని కోరారు.
Atchannaidu: రోడ్ల పునరుద్ధరణ, ప్రజా రవాణాకు ప్రాధాన్యం
ప్రజల రాకపోకలకు ఎలాంటి ఇబ్బందులు తలెత్తకుండా వర్షాల వల్ల దెబ్బతిన్న ప్రధాన రహదారులకు వెంటనే మరమ్మతులు చేపట్టాలని కలెక్టర్లను మంత్రి ఆదేశించారు. ఎప్పటికప్పుడు పరిస్థితులను సమీక్షిస్తూ జిల్లా యంత్రాంగం నిరంతరం అప్రమత్తంగా ఉండాలని ఆయన స్పష్టం చేశారు.
Read also: Medical Student Suicide: విశాఖలో విషాదం.. ఆంధ్ర మెడికల్ కాలేజీ విద్యార్థిని ఆత్మహత్య
వర్షపు నీటి సంరక్షణ – శాఖల సమన్వయం
ప్రస్తుతం కురుస్తున్న వర్షపు నీటిని వృథా చేయకుండా భవిష్యత్తు అవసరాల కోసం సంరక్షించుకోవాలని మంత్రి సూచించారు. పంటలకు నష్టం చేకూర్చే చోట నీటిని తొలగిస్తూనే, మరోవైపు చెరువులు, జలాశయాలు మరియు ఇతర నీటి వనరుల్లో నీటిని నిల్వ చేసి రాబోయే సాగు, తాగునీటి అవసరాలకు వినియోగించుకునేలా పక్కా ప్రణాళికలు రూపొందించాలన్నారు. వ్యవసాయ, ఉద్యాన, పశుసంవర్ధక, మత్స్య శాఖలు సమష్టిగా పనిచేస్తూ రైతులకు, ప్రజలకు సకాలంలో సహాయం అందించాలని అచ్చెన్నాయుడు పిలుపునిచ్చారు.
Read Also hindi news: hindi.vaartha.com
Read Also Epaper : epaper.vaartha.com
Read Also :
