- ప్రాణాలు కోల్పయిన వారిలో ఇద్దరు ఆర్మీ ఉన్నతాధికారులు
కిన్షాసా: కాంగోలో ఆర్మీ ఉన్నతాధికారులతో వెళుతున్న చిన్న విమానం ఒకటి కుప్పకూలింది. ఈ ప్రమాదంలో ఆర్మీకి చెందిన ఇద్దరు సీనియర్ అధికారులతో పాటు మొత్తం 17 మంది దుర్మరణం చెందారు. కాంగో సైనిక అధికార ప్రతినిధి మేజర్ జనరల్ ఎఫోమి ఎకెంగే శుక్రవారం ఈ విషయాన్ని అధికారికంగా వెల్లడించారు.
దేశ సైనిక కోర్టు ప్రధానాధికారి లెఫ్టినెంట్ జనరల్ ముటోంబో కటాలయి టియెండే, సాయుధ బలగాల ఆడిటర్ జనరల్ లెఫ్టినెంట్ జనరల్ బాకుమి లుకిలియా ఈ ప్రమాదంలో ప్రాణాలు కోల్పోయారు. వీరితో పాటు ప్రతినిధి బృందానికి చెందిన మరో 12 మంది, విమాన సిబ్బంది కూడా ప్రాణాలు కోల్పోయినట్లు ఆయన తెలిపారు.
నైరుతి ప్రాంతంలోని కిక్విట్ నగరం నుంచి దేశ రాజధాని కిన్షాసాకు తిరిగి వస్తుండగా ఈ ప్రమాదం జరిగింది. విమానంలో తలెత్తిన సాంకేతిక లోపం కారణంగా కెంజె ప్రాంతంలో కూలిపోయినట్లు స్థానిక అధికారులు పేర్కొన్నారు. సివిల్ ఏవియేషన్ అథారిటీ బోర్డు చైర్మన్ ట్రిఫన్ కిన్-కియె
ములుంబా మాట్లాడుతూ.. ప్రమాదానికి ఖచ్చితమైన కారణం ఇంకా తెలియాల్సి ఉందని చెప్పారు.
