దేశవ్యాప్తంగా ఓటు చోరీ వివాదం, ఎన్నికల కమిషనర్ జ్ఞానేశ్ కుమార్‌పై విపక్షాలు ఆరోపణలు గుప్పిస్తున్న తరుణంలో, తెలంగాణలో ప్రధాన ప్రతిపక్షమైన బీఆర్ఎస్ వ్యవహరిస్తున్న తీరు తీవ్ర చర్చనీయాంశంగా మారింది. ప్రజాస్వామ్యానికే ముప్పు తెచ్చేలా ఓట్ల అక్రమాలపై ఇంత హంగామా నడుస్తుంటే, నిత్యం గల్లీ ఇష్యూలకే ప్రెస్ మీట్లు పెట్టే గులాబీ నేతలు ఇప్పుడు పూర్తిగా సైలెంట్ మోడ్‌లోకి వెళ్లిపోయారు. గల్లీ నుంచి ఢిల్లీ దాకా ప్రతి చిన్న విషయానికి ట్వీట్లు పెట్టే గులాబీ బాస్‌లు, ఈ కీలక అంశంలో మాత్రం కనీసం ఒక్క రియాక్షన్ కూడా ఇవ్వకపోవడం వెనుక ఏ ఢిల్లీ డీల్ ఉందో మరి అనే అనుమానాలు రాజకీయ విశ్లేషకుల్లో వ్యక్తమవుతున్నాయి.
ప్రస్తుతం దేశ రాజకీయాలను కుదిపేస్తున్న ఈ ఓట్ల దొంగతనం వ్యవహారంలో బీఆర్ఎస్ పార్టీ సడన్‌గా గాంధీ గారి మూడు కోతుల సిద్ధాంతాన్ని పక్కాగా తలకెత్తుకుందని సోషల్ మీడియాలో విపరీతంగా వెటకారపు సెటైర్లు పేలుతున్నాయి. అక్కడ ఎంత పెద్ద ఓట్ల దొంగతనం జరుగుతున్నా చెడు చూడకూడదు అని గులాబీ నేతలు కళ్లు మూసేసుకున్నారు. ఎన్నికల కమిషనర్ జ్ఞానేశ్ కుమార్‌పై ప్రతిపక్షాలన్నీ యుద్ధం ప్రకటిస్తూ ఇన్ని ఆరోపణలు చేస్తున్నా చెడు వినకూడదు అని చెవులు మూసేసుకున్నారు. చివరకు దీనిపై కనీసం ఒక్క ప్రెస్ నోట్ కూడా వదలకుండా చెడు మాట్లాడకూడదు అని నోటికి ప్లాస్టర్ వేసుకుని మహానటి రేంజ్ మౌన ముద్ర దాల్చారు.
ఎప్పుడూ ప్రజా సమస్యలపై గళమెత్తే తామే అసలైన గొంతుక అని చెప్పుకునే బీఆర్ఎస్, ఇంత పెద్ద ఇష్యూలో ఈ స్థాయి మౌనం దాల్చడం చూస్తుంటే వెనుక ఏమైనా తెరవెనుక ఒప్పందాలు నడుస్తున్నాయా అనే అనుమానాలు ప్రజలకు రాక మానవు. ఎన్నికల వ్యవస్థపైనే నమ్మకం పోయేలా ఇంత పెద్ద ఎత్తున చర్చ జరుగుతుంటే, ఒక్క ప్రకటన కూడా చేయకపోవడం బీఆర్ఎస్ రాజకీయ వ్యూహమా లేక మరేదైనా పొలిటికల్ మ్యాచ్ ఫిక్సింగా అని విపక్షాలు సైతం ప్రశ్నిస్తున్నాయి. మొత్తానికి జ్ఞానేశ్ కుమార్ వ్యవహారంలో బీఆర్ఎస్ అవలంబిస్తున్న ఈ వ్యూహాత్మక మౌనం, ఆ పార్టీ లాయల్టీని మరోసారి ప్రజల్లో తీవ్రమైన ప్రశ్నార్థకంగా మార్చేసింది.
The post ఓట్ల చోరీపై గులాబీ పార్టీ మౌనం ఎందుకు..? appeared first on Telugu Rajyam.
