బ్యాంకుల సమ్మె.. రేపే అకౌంట్లలోకి జీతాలు

Banks Bandh : ఈ నెల 28 నుంచి 30 వరకు బ్యాంకు ఉద్యోగుల సమ్మె జరగనున్న నేపథ్యంలో కేంద్ర ప్రభుత్వం ప్రభుత్వ ఉద్యోగులకు మరియు పెన్షనర్లకు...

Banks Bandh : ఈ నెల 28 నుంచి 30 వరకు బ్యాంకు ఉద్యోగుల సమ్మె జరగనున్న నేపథ్యంలో కేంద్ర ప్రభుత్వం ప్రభుత్వ ఉద్యోగులకు మరియు పెన్షనర్లకు శుభవార్త అందించింది. సాధారణంగా నెల చివరి రోజుల్లో చెల్లించే సెప్టెంబర్ నెల జీతాలు మరియు పెన్షన్ డబ్బులను రేపే (సెప్టెంబర్ 25) అకౌంట్లలో జమ చేసేందుకు అనుమతినిస్తూ కీలక ఉత్తర్వులు జారీ చేసింది. సమ్మె కారణంగా బ్యాంకింగ్ సేవలకు అంతరాయం ఏర్పడి, నగదు విత్‌డ్రాలు మరియు ఆన్‌లైన్ బదిలీల్లో ఇబ్బందులు రాకుండా ముందస్తు జాగ్రత్తగా కేంద్రం ఈ నిర్ణయం తీసుకుంది. ఈ ముందస్తు చెల్లింపుల నిర్ణయం కేవలం సాధారణ సివిల్ ఉద్యోగులకే కాకుండా డిఫెన్స్ (రక్షణ), పోస్టల్, మరియు టెలికమ్యూనికేషన్ విభాగాలు, అలాగే ఆర్మ్‌డ్ ఫోర్సెస్ ఉద్యోగులందరికీ వర్తిస్తుందని ప్రభుత్వం స్పష్టం చేసింది.

‘అడ్వాన్స్ పేమెంట్’గా జమ – అక్టోబర్‌లో లెక్కల సర్దుబాటు

ప్రభుత్వం రేపు విడుదల చేసే ఈ మొత్తం సొమ్మును ‘అడ్వాన్స్ పేమెంట్’ (ముందస్తు చెల్లింపు)గా పరిగణించనున్నారు. నెల ఆఖరి నాటికి ఉద్యోగుల పూర్తి జీతాల లెక్కలు, అలవెన్సులు మరియు ఇతర కటింగ్‌ల అకౌంటింగ్ ప్రక్రియ ఖరారైన తర్వాత, ఏవైనా వ్యత్యాసాలు ఉంటే వాటిని అక్టోబర్ నెల చెల్లింపుల్లో సర్దుబాటు (Adjust) చేస్తారని అధికారిక వర్గాలు వెల్లడించాయి. వరుస సెలవులు మరియు బ్యాంకుల సమ్మె కారణంతో ఆర్ధిక ఇబ్బందులు ఎదురుకాకుండా కేంద్రం తీసుకున్న ఈ వేగవంతమైన నిర్ణయం పట్ల ఉద్యోగ, పెన్షనర్ల సంఘాలు హర్షం వ్యక్తం చేస్తున్నాయి.