Fake GLP-1 Medicine | మధుమేహం, ఊబకాయం చికిత్సలో జీఎల్‌పీ-1 గ్రాహక ప్రేరేపక మందులు కీలక మార్పు తీసుకొచ్చాయి. సెమాగ్లుటైడ్, లిరాగ్లుటైడ్, టిర్జెపటైడ్ వంటి మందులకు ప్రపంచవ్యాప్తంగా డిమాండ్ వేగంగా పెరగడంతో సరఫరా కంటే అవసరం ఎక్కువగా మారింది. దీంతో ఆమోదం పొందని మందులు, ప్రత్యేకంగా తయారు చేసిన ఉత్పత్తులు, నకిలీ మందులకు కూడా మార్కెట్ పెరుగుతోంది. ఆన్‌లైన్ ఆరోగ్య వేదికలు, సామాజిక మాధ్యమాల ద్వారా మందులు అందుబాటులోకి రావడం వల్ల వైద్యుడిని ప్రత్యక్షంగా కలవకుండానే మందులు పొందే పరిస్థితి ఏర్పడింది. అయితే ఇదే సౌలభ్యం నియంత్రణ సంస్థల పరిశీలనకు లోనుకాని ఉత్పత్తులు వినియోగదారులకు చేరే అవకాశాన్ని కూడా పెంచుతోంది.
అమెరికా ఎఫ్డీఏ చర్యలు..
2026లో అమెరికా ఆహార, ఔషధ నియంత్రణ సంస్థ అనుమతి లేని జీఎల్‌పీ-1 ఉత్పత్తులను విస్తృతంగా ప్రచారం చేస్తున్న సంస్థలపై చర్యలకు ప్రయత్నాలు ప్రారంభించింది. అనంతరం పలు టెలిహెల్త్ సంస్థలకు తప్పుడు లేదా తప్పుదోవ పట్టించే ప్రకటనలపై హెచ్చరికలు జారీ చేసింది. కొంతమంది తయారీదారులు అసలు ఆమోదం పొందిన మందుల్లో ఉపయోగించిన పదార్థాలకు భిన్నమైన ఉప్పు రూపాలను ఉపయోగిస్తున్నట్లు కూడా నిపుణులు ఆందోళన వ్యక్తం చేశారు. అలాగే కొన్ని ఉత్పత్తుల్లో ఇతర పదార్థాలు కలవడం వల్ల కొత్త రసాయనాలు ఏర్పడే అవకాశం ఉందని అధ్యయనాలు సూచించాయి. అయితే వాటి వల్ల కలిగే పూర్తి ఆరోగ్య ప్రభావాలు ఇంకా స్పష్టంగా తెలియలేదు.
మోతాదు పెద్ద సమస్య..
మరో ముఖ్యమైన సమస్య మోతాదు విషయంలో తలెత్తుతోంది. ఒకసారి తెరిచిన సీసాల నుంచి రోగులే మందును కొలిచి తీసుకునే విధానం వల్ల సూచించిన మోతాదు కంటే అనేక రెట్లు ఎక్కువగా ఇంజెక్షన్ తీసుకున్న ఘటనలు నమోదయ్యాయి. సరైన పరిస్థితుల్లో నిల్వ చేయకపోతే ఈ మందుల్లోని క్రియాశీల పదార్థాలు దెబ్బతినే అవకాశం ఉంది. దీంతో మందు లేబుల్‌పై పేర్కొన్న దానికంటే తక్కువ లేదా ఎక్కువ ప్రభావం కలిగే ప్రమాదం ఉంటుంది. యూరప్‌లో కూడా ఆమోదం లేని జీఎల్‌పీ-1 మందులను నకిలీ వెబ్‌సైట్లు, సామాజిక మాధ్యమ ఖాతాల ద్వారా విక్రయిస్తున్న ఘటనలు పెరిగినట్లు నియంత్రణ సంస్థలు హెచ్చరించాయి. కొన్ని నకిలీ మందుల్లో అసలు క్రియాశీల పదార్థమే ఉండ‌డం లేద‌ని, మరికొన్నింటిలో హానికరమైన పదార్థాలు ఉంటున్నాయ‌ని పేర్కొన్నాయి.
అప్ర‌మ‌త్త‌త అవసరం..
ఆమోదం పొందిన మందులు, అవసరమైన రోగికి లైసెన్స్‌ పొందిన ఫార్మసీ ద్వారా ప్రత్యేకంగా తయారు చేసే మందులు, ఆమోదం లేని ఉత్పత్తులు, పూర్తిగా నకిలీ మందులు.. ఇవన్నీ ఒకటే కాదని స్పష్టత అవసరం. ముఖ్యంగా భారత్‌లో జీఎల్‌పీ-1 మందుల పోటీ, అందుబాటు పెరుగుతున్న సమయంలో ఈ తేడాను వినియోగదారులు తెలుసుకోవడం ముఖ్యం. తక్కువ ధర కోసం తెలియని ఆన్‌లైన్ వనరుల నుంచి మందులు కొనుగోలు చేయడం ప్రమాదకరం అవుతుంది. తయారీదారు నుంచి రోగి వరకు మందుల సరఫరాను గుర్తించే వ్యవస్థలు, ఆన్‌లైన్ విక్రయాలపై పర్యవేక్షణ, సరైన ప్రిస్క్రిప్షన్ విధానం, మందుల దుష్ప్రభావాలపై పర్యవేక్షణ, ప్రజలకు అవగాహన వంటి చర్యలు అవసరం. జీఎల్‌పీ-1 మందుల వినియోగం పెరుగుతున్న నేపథ్యంలో వాటి లభ్యతతోపాటు నాణ్యత, భద్రతపై కూడా దృష్టి పెట్టాల్సిన అవసరం ఉందని నిపుణులు సూచిస్తున్నారు.
