అదృష్టం తలుపు తడితే ఎలా ఉంటుందో ఈ ఘటన చూస్తే అర్థమవుతుంది. ఓ సాధారణ టీ స్టాల్ నిర్వాహకుడికి లక్కీ డ్రాలో బార్ అండ్ రెస్టారెంట్ దక్కింది. 376 మంది పోటీ పడిన చోట.. ఒక్క దరఖాస్తుతోనే అదృష్టం అతడిని వరించింది. దీంతో నిన్నటి వరకు టీ అమ్ముతూ జీవనం సాగించిన ఆ వ్యక్తి పేరు ఇప్పుడు జిల్లా అంతటా మారుమోగుతోంది. బార్ కోసం పోటీపడిన వారు సైతం ఇప్పుడు ఆయనకు ఆఫర్లు ఇస్తున్నారట. ఇంతకీ ఎవరా అదృష్టవంతుడు? ఎక్కడ జరిగిందీ ఘటన?
లక్కీ డ్రాలో బార్ అండ్ రెస్టారెంట్ దక్కడం అంటే మాటలు కాదు. అందులోనూ వందల మంది పోటీపడుతున్న వేళ అదృష్టం ఒక్కరినే వరించడం విశేషం. ములుగు జిల్లా కేంద్రంలోని బార్ అండ్ రెస్టారెంట్ కోసం మొత్తం 376 మంది దరఖాస్తు చేసుకున్నారు. తీవ్ర పోటీ నెలకొన్నప్పటికీ.. హనుమకొండకు చెందిన ఓ సాధారణ టీ స్టాల్ నిర్వాహకుడిని అదృష్టం వరించింది. లక్కీ డ్రా ద్వారా ఆయనకు బార్ అండ్ రెస్టారెంట్ దక్కడంతో ఈ విషయం స్థానికంగా చర్చనీయాంశంగా మారింది.
హనుమకొండ బస్టాండ్ సమీపంలో టీ పాయింట్ నిర్వహిస్తూ జీవనం సాగిస్తున్న వల్లపు వెంకటేష్‌కు ఈ అనూహ్య అదృష్టం దక్కింది. ములుగు జిల్లాలోని నూతన మున్సిపాలిటీ పరిధిలో బార్ అండ్ రెస్టారెంట్ నిర్వహణ కోసం ఆబ్కారీ శాఖ దరఖాస్తులు ఆహ్వానించింది. మొత్తం 376 మంది దరఖాస్తు చేసుకోగా.. వెంకటేష్ తన వద్ద ఉన్న డబ్బుతో రూ.లక్ష చెల్లించి ఒకే దరఖాస్తు వేశారు. అయితే, ఇంతమంది పోటీపడుతున్నా లక్కీ డ్రాలో ఆయనకే బార్ అండ్ రెస్టారెంట్ దక్కింది. దీంతో ఆయన ఆనందానికి అవధులు లేకుండా పోయాయి.
ఇన్నాళ్లూ టీ స్టాల్ నిర్వహిస్తూ కుటుంబాన్ని పోషించిన వెంకటేష్‌కు ఒక్కసారిగా బార్ అండ్ రెస్టారెంట్ దక్కడం భావోద్వేగానికి గురిచేసింది. తనకు వచ్చిన అదృష్టాన్ని చూసి ఆయన కన్నీటి పర్యంతమైనట్లు సమాచారం. ఇక బార్ కోసం పోటీపడిన పలువురు ఇప్పుడు వెంకటేష్‌కు వివిధ ఆఫర్లు ఇస్తున్నట్లు తెలుస్తోంది. ఏదేమైనా.. 376 మంది పోటీలో ఒక్క దరఖాస్తుతో బార్ అండ్ రెస్టారెంట్ దక్కించుకున్న వెంకటేష్ కథ ఇప్పుడు ములుగు జిల్లాలో హాట్ టాపిక్‌గా మారింది.
