Ownly Food App: హైదరాబాద్‌లో ఫుడ్ డెలివరీ రంగంలోకి రైడ్ హేలింగ్ సంస్థ రాపిడో అడుగుపెట్టింది. ఇందుకోసం ‘ఓన్లీ (Ownly)’ పేరుతో ఫుడ్ డెలివరీ సేవలను నగరంలో ప్రారంభించినట్లు సంస్థ ప్రకటించింది. ఈ సేవలో జీరో కమిషన్ విధానం ప్రధాన ప్రత్యేకతగా నిలుస్తోంది. అంటే రెస్టారెంట్ల నుంచి కమిషన్ వసూలు చేయకుండా ఫుడ్ డెలివరీ సేవలను అందించనున్నట్లు కంపెనీ తెలిపింది.
Read Also :Gold and Silver Prices: తెలుగు రాష్ట్రాల్లో నేటి బంగారం, వెండి రేట్లు ఇవే!
రెస్టారెంట్లకు జీరో కమిషన్
ఓన్లీ ఫుడ్ డెలివరీ ప్లాట్‌ఫామ్‌లో రెస్టారెంట్లు ఎలాంటి కమిషన్ చెల్లించాల్సిన అవసరం లేదని రాపిడో తెలిపింది. కస్టమర్లు తమ ఆహారం ధరతో పాటు డెలివరీ ఛార్జీని మాత్రమే చెల్లించే విధానాన్ని తీసుకొచ్చినట్లు పేర్కొంది. జీరో కమిషన్ విధానం ద్వారా రెస్టారెంట్లపై పడే అదనపు భారం తగ్గుతుందని కంపెనీ చెబుతోంది. ఫుడ్ డెలివరీలో పారదర్శకమైన ధరల విధానాన్ని అందించడమే తమ లక్ష్యమని వెల్లడించింది.
బెంగళూరు తర్వాత హైదరాబాద్‌లోకి..
రాపిడో ఈ ఏడాది ప్రారంభంలో తొలిసారిగా బెంగళూరులో ఓన్లీ ఫుడ్ డెలివరీ సేవలను ప్రారంభించింది. అక్కడి తర్వాత ఇప్పుడు హైదరాబాద్‌లో సేవలను విస్తరించింది. బిర్యానీ, ఇరానీ టీ, కేఫ్‌లు, లేట్ నైట్ ఫుడ్‌కు హైదరాబాద్‌కు ప్రత్యేక గుర్తింపు ఉంది. ఈ నేపథ్యంలో ఫుడ్ డెలివరీ మార్కెట్‌లో ఇప్పటికే జొమాటో, స్విగ్గీ వంటి సంస్థలు సేవలు అందిస్తుండగా.. ఇప్పుడు రాపిడో కూడా పోటీలోకి వచ్చింది.
రాపిడో కెప్టెన్లకు కీలక పాత్ర
ఓన్లీ ఫుడ్ డెలివరీ సేవల్లో రాపిడో కెప్టెన్ కమ్యూనిటీకి కీలక పాత్ర ఉంటుందని సంస్థ తెలిపింది. రాపిడో రైడ్ సేవలకు డ్రైవర్లు అందిస్తున్న సహకారం మాదిరిగానే.. ఓన్లీ ద్వారా ఫుడ్‌ను కస్టమర్లకు చేరవేయడంలోనూ వారు ముఖ్యమైన భాగస్వాములుగా ఉంటారని పేర్కొంది. హైదరాబాద్‌లో ఓన్లీ సేవల ప్రారంభాన్ని పురస్కరించుకుని రాపిడో కెప్టెన్ల కోసం ప్రత్యేకంగా బిర్యానీ పార్టీని కూడా నిర్వహించింది. నగరంలోని వివిధ ప్రాంతాల నుంచి కెప్టెన్లు ఈ కార్యక్రమానికి హాజరయ్యారు.
నాని సందడి
ఓన్లీ హైదరాబాద్ లాంచ్ కార్యక్రమంలో టాలీవుడ్ హీరో నాని కూడా పాల్గొన్నారు. నగరంలోని వివిధ ప్రాంతాల నుంచి వచ్చిన రాపిడో కెప్టెన్లతో ఆయన ముచ్చటించారు. కెప్టెన్ కమ్యూనిటీని గుర్తిస్తూ నిర్వహించిన ఈ కార్యక్రమంలో బిర్యానీ పార్టీ ప్రత్యేక ఆకర్షణగా నిలిచింది.
‘హైదరాబాద్ సహజమైన తదుపరి గమ్యం’
హైదరాబాద్‌లో ఫుడ్ డెలివరీ సేవలను ప్రారంభించడంపై రాపిడో, ఓన్లీ సహ వ్యవస్థాపకుడు అరవింద్ శంకా స్పందించారు. దేశంలోని ఆహార ప్రియులకు, ముఖ్యంగా బిర్యానీ విషయంలో హైదరాబాద్‌కు ప్రత్యేక స్థానం ఉందని పేర్కొన్నారు. అందుకే ఓన్లీ విస్తరణకు హైదరాబాద్ సహజమైన తదుపరి గమ్యస్థానంగా మారిందని తెలిపారు. వినియోగదారులు తమ ఆహారం, డెలివరీకి మాత్రమే చెల్లించే విధానాన్ని తీసుకొచ్చామని చెప్పారు. బెంగళూరులో తమ జీరో కమిషన్ విధానానికి స్పందన లభించిందని, హైదరాబాద్‌లోనూ అదే విధమైన ఆదరణ లభిస్తుందని ఆశిస్తున్నట్లు తెలిపారు.
Ownly Food App: జొమాటో, స్విగ్గీకి పోటీగా కొత్త ప్లేయర్
హైదరాబాద్‌లో ఇప్పటికే జొమాటో, స్విగ్గీతో పాటు పలు ఫుడ్ డెలివరీ ప్లాట్‌ఫామ్‌లు ఉన్నాయి. ఇప్పుడు రాపిడో ఓన్లీతో రంగంలోకి రావడంతో ఫుడ్ డెలివరీ మార్కెట్‌లో పోటీ మరింత పెరగనుంది. ముఖ్యంగా రెస్టారెంట్లకు జీరో కమిషన్, కస్టమర్లకు ఫుడ్ ధరతో పాటు డెలివరీ ఛార్జీ చెల్లించే విధానం ఓన్లీ ప్రధాన ప్రత్యేకతగా నిలుస్తోంది. హైదరాబాద్‌లో ఈ కొత్త ఫుడ్ డెలివరీ మోడల్‌కు వినియోగదారులు, రెస్టారెంట్ల నుంచి ఎలాంటి స్పందన వస్తుందనేది ఆసక్తికరంగా మారింది.
Read Also hindi news: hindi.vaartha.com
Read Also Epaper : epaper.vaartha.com
Read Also :
