స్మార్ట్‌ఫోన్ వినియోగదారుల కోసం కేంద్ర ప్రభుత్వం ఒక కీలక నిర్ణయం తీసుకుంది. మార్కెట్లో లభించే తక్కువ నాణ్యత కలిగిన స్క్రీన్ ప్రొటెక్టర్లు, టెంపర్డ్ గ్లాస్‌ల విక్రయాలకు అడ్డుకట్ట వేస్తూ కొత్త నిబంధనలను జారీ చేసింది. కేంద్ర ఎలక్ట్రానిక్స్, ఐటీ మంత్రిత్వ శాఖ వీటిని బ్యూరో ఆఫ్ ఇండియన్ స్టాండర్డ్స్ (BIS) తప్పనిసరి రిజిస్ట్రేషన్ పరిధిలోకి తీసుకువచ్చింది. 2027 ఏప్రిల్ 1 నుంచి భారత మార్కెట్లో ఐఎస్ 19348:2025 (IS 19348:2025) ప్రమాణాలకు అనుగుణంగా ఉన్న స్క్రీన్ ప్రొటెక్టర్లనే విక్రయించాల్సి ఉంటుందని స్పష్టం చేసింది. తయారీదారులు మరియు దిగుమతిదారులు కొత్త నాణ్యతా ప్రమాణాలకు అనుగుణంగా తమ ఉత్పత్తులను సిద్ధం చేసుకునేందుకు వీలుగా కేంద్రం 2027 ఏప్రిల్ 1 వరకు గడువు ఇచ్చింది. కొత్త నిబంధనల ప్రకారం గ్లాస్ నాణ్యత, పరిమాణం, బలం, కాంతి ప్రసారం మరియు ఉపరితల స్పష్టత వంటి అంశాలపై కఠిన పరీక్షలు ఉంటాయి. అంతేకాకుండా, స్క్రీన్‌కు వాడే అంటుకునే పదార్థం, యాంటీ-షట్టర్ ఫిల్మ్, ప్రైవసీ ఫిల్మ్, ఆయిల్ నిరోధక కోటింగ్ మరియు బ్లూ లైట్ ఫిల్టరింగ్ ప్రమాణాలను కూడా బీఐఎస్ నిర్ణయించింది. ఇకపై ప్రొటెక్టర్ ప్యాకేజింగ్‌పై తయారీదారు పేరు, బ్యాచ్ నెంబర్, మందం వంటి వివరాలను స్పష్టంగా ముద్రించడం తప్పనిసరి. బీఐఎస్ చట్టం 2016 కింద తీసుకువచ్చిన ఈ నిబంధనల వల్ల మార్కెట్‌లోకి నకిలీ, నాసిరకం ఉత్పత్తుల ప్రవాహం తగ్గి, వినియోగదారులకు నాణ్యమైన, సురక్షితమైన స్క్రీన్ గార్డులు అందుబాటులోకి రానున్నాయి. అయితే, ధరల పెంపుపై ప్రభుత్వం ఎలాంటి అధికారిక ప్రకటన చేయనప్పటికీ, పరీక్షలు మరియు ధృవీకరణల కారణంగా తయారీదారుల నిర్వహణ వ్యయంలో స్వల్ప మార్పులు వచ్చే అవకాశం ఉంది.
మరిన్ని వీడియోల కోసం ఇక్కడ క్లిక్ చేయండి
Also Watch:
The Paradise Review: ది ప్యారడైస్‌కు దిష్టి తగిలింది! సినిమాకు ప్లస్, మైనస్ పాయింట్లు ఇవే
వేధింపులు తట్టుకోలేను.. విషమిస్తే నేనే చచ్చిపోతా
జానీ మాస్టర్‌ వైఫ్‌కు.. దిమ్మతిరిగే షాక్
మతిమరుపుతో తప్పిపోయిన వ్యక్తి.. కుటుంబంతో కలిపిన చాట్‌జీపీటీ
