రాజీనామా ఆలోచనలో కొలికపూడి..?

ఎన్టీఆర్ జిల్లా తిరువూరు అసెంబ్లీ నియోజకవర్గంలో అధికార తెలుగుదేశం పార్టీ అంతర్గత రాజకీయం తీవ్రస్థాయికి చేరింది. అమరావతి ఉద్యమం ద్వారా వెలుగులోకి వచ్చి, టీడీపీ అధినేత చంద్రబాబు నాయుడు ఆశీస్సులతో ఎమ్మెల్యేగా గెలిచిన కొలికపూడి శ్రీనివాసరావు చుట్టూ ప్రస్తుతం తీవ్ర వివాదాలు ముసురుతున్నాయి. నియోజకవర్గంలో జరుగుతున్న వరుస పరిణామాలు, సొంత పార్టీ నేతలతో విభేదాల నేపథ్యంలో ఆయన తన ఎమ్మెల్యే పదవికి రాజీనామా చేసే యోచనలో ఉన్నారంటూ రాజకీయ వర్గాల్లో ఒక ఆసక్తికరమైన చర్చ నడుస్తోంది.

గత కొంతకాలంగా నియోజకవర్గంలో ఎమ్మెల్యే కొలికపూడి శ్రీనివాసరావుకు స్థానిక క్యాడర్, నేతల నుంచి తీవ్రమైన ఒత్తిడి ఎదురవుతోంది. ఇటీవల ఒక స్కూల్ పీఈటీ ఉపాధ్యాయుడిపై దాడి ఆరోపణలు రావడం, అలాగే సామాజిక సంక్షేమ బోర్డు చైర్మన్ పోతుల బాల కోటయ్య బహిరంగంగా మాటల యుద్ధానికి దిగడం జిల్లా వ్యాప్తంగా తీవ్ర దుమారం రేపింది. ఇవే కాకుండా, తన ఎస్సీ రిజర్వ్‌డ్ నియోజకవర్గంలో జరుగుతున్న అధికారిక అభివృద్ధి పనుల ప్రారంభోత్సవాల గురించి కనీసం తనకు సమాచారం ఇవ్వడం లేదంటూ ఆయన సోషల్ మీడియా వేదికగా ఆరోపణలు గుప్పించారు.

ఈ తరహా బహిరంగ పోస్టులు మరియు గ్రూపు రాజకీయాల వల్ల అటు నియోజకవర్గ ప్రజల్లో, ఇటు సొంత క్యాడర్‌లో ఎమ్మెల్యేపై తీవ్ర అసంతృప్తి వ్యక్తమవుతోంది. ఈ అంతర్గత ఘర్షణలు మరియు ఎమ్మెల్యే ప్రవర్తనపై టీడీపీ రాష్ట్ర అధిష్టానం తీవ్ర ఆగ్రహం వ్యక్తం చేసింది. పార్టీ పరువుకు నష్టం కలిగించేలా ప్రవర్తిస్తే ఊరుకునేది లేదని స్పష్టం చేస్తూ.. టీడీపీ రాష్ట్ర అధ్యక్షుడు పల్లా శ్రీనివాసరావు నేరుగా ఎమ్మెల్యే కొలికపూడిని పిలిపించి వివరణ కోరారు. భవిష్యత్తులో ఇలాంటి బహిరంగ విమర్శలు చేస్తే క్రమశిక్షణా చర్యలు ఉంటాయని గట్టిగానే హెచ్చరించినట్లు సమాచారం.

గతంలో కూడా సస్పెండ్ చేయాలంటూ అల్టిమేటం ఇచ్చినప్పటికీ అధిష్టానం పట్టించుకోకపోవడం, తాజా ఇష్యూలలోనూ తన మాట వినకుండా సొంత పార్టీ పెద్దలే గట్టిగా మందలించడంతో ఎమ్మెల్యే తీవ్ర మనస్తాపానికి గురైనట్లు తెలుస్తోంది. నియోజకవర్గంలో సొంత పార్టీ ఎంపీ అనుచరుల నుంచి వస్తున్న వ్యతిరేకతను తట్టుకోలేక, అటు అధిష్టానం నుంచి సరైన సపోర్ట్ లభించకపోవడంతో కొలికపూడి శ్రీనివాసరావు తీవ్ర ఇరకాటంలో పడ్డారు. తన ఆవేదనను అధిష్టానం వినడం లేదనే కోపంతో, తన ఆత్మగౌరవాన్ని కాపాడుకోవడానికి రాజీనామా చేయడమే ఏకైక మార్గమనే ఆలోచనలో ఆయన ఉన్నట్లు అనుచర వర్గాల్లో ప్రచారం జరుగుతోంది. మరి చంద్రబాబు నాయుడు కల్పించుకుని తిరువూరు పంచాయితీని చక్కదిద్దుతారా లేక కొలికపూడి నిజంగానే సంచలన నిర్ణయం వైపు అడుగులు వేస్తారా అనేది రానున్న రోజుల్లో తేలనుంది.

The post రాజీనామా ఆలోచనలో కొలికపూడి..? appeared first on Telugu Rajyam.