విజయవాడ ఇంద్రకీలాద్రిపై కొలువై ఉన్న కనకదుర్గమ్మ శరన్నవరాత్రుల ఉత్సవాలు ప్రస్తుతం అత్యంత వైభవంగా సాగుతున్నాయి. అయితే, ఈ ఆధ్యాత్మిక సంబరాల నడుమ ఆలయ పరిపాలన చుట్టూ ముసురుకుంటున్న వివాదాలు మాత్రం పొలిటికల్ సర్కిల్స్‌లో హాట్ టాపిక్‌గా మారాయి. ఈ ఏడాది దేవీ నవరాత్రుల నిర్వహణలో ప్రజాప్రతినిధుల కంటే అధికారుల పెత్తనమే ఎక్కువగా నడుస్తోందనే విమర్శలు బలంగా వినిపిస్తున్నాయి. ఆలయ ఈఓ సహా కీలక విభాగాల అధికారులు తీసుకుంటున్న ఏకపక్ష నిర్ణయాల వల్ల.. స్థానిక అధికార కూటమికి చెందిన ఎంపీ, ఎమ్మెల్యేలతో పాటు ద్వితీయ శ్రేణి నాయకులు తీవ్ర ఇబ్బందులు పడుతున్నట్లు సమాచారం.
సాధారణంగా నవరాత్రుల ఉత్సవాలు జరుగుతున్న సమయంలో స్థానిక ఓటర్లు, నియోజకవర్గ పరిధిలోని కీలక అనుచరులు, వీఐపీలు అమ్మవారి దర్శనం కోసం స్థానిక ప్రజాప్రతినిధులను ఆశ్రయించడం దశాబ్దాలుగా వస్తున్న ఆనవాయితీ. అయితే, ఈసారి అధికారుల అతి ఉత్సాహం వల్ల స్థానిక ఎంపీ కానీ, ఎమ్మెల్యేలు కానీ తమను నమ్మి వచ్చిన వారికి కనీసం ప్రోటోకాల్ దర్శనాలు కూడా చేయించలేక చేతులెత్తేయాల్సిన పరిస్థితి వచ్చిందని క్యాడర్ వాపోతోంది. “అధికారులు చెప్పిందే రాజ్యం.. వారు గీసిందే గీత” అన్నట్లుగా ఆలయ పరిపాలన సాగుతుండటంతో, ప్రజాప్రతినిధుల సిఫార్సు లేఖలకు కనీస విలువ దక్కలేదనే అసంతృప్తి కూటమి నాయకుల్లో వ్యక్తమవుతోంది.
విజయవాడ మున్సిపల్ కార్పొరేషన్ ఎన్నికల షెడ్యూల్ విడుదలవుతున్న ప్రస్తుత తరుణంలో.. ఉత్సవాల వేళ నడుస్తున్న ఈ ‘దుర్గగుడి వివాదం’ కూటమి పార్టీల అంతర్గత సమీకరణాలపై తీవ్ర ప్రభావం చూపేలా కనిపిస్తోందని విశ్లేషకులు భావిస్తున్నారు. స్థానిక కార్పొరేటర్ అభ్యర్థులు, డివిజన్ల లీడర్లు తమ అనుచరులకు అమ్మవారి దర్శనం చేయించుకోలేకపోవడంతో ఓటర్ల ముందు వారి ప్రతిష్ట దెబ్బతింటోంది. సొంత ప్రభుత్వం అధికారంలో ఉన్నా ఒక చిన్న పని కూడా చేయించుకోలేకపోతున్నామనే నిరాశ క్యాడర్‌లో కనిపిస్తోంది.
దర్శనాల విషయంలో తీవ్ర ఇబ్బందులు పడుతున్న స్థానిక భక్తులు, ఓటర్లు.. ఈ వైఫల్యాన్ని ప్రజాప్రతినిధుల ఖాతాలోనే వేస్తున్నారు. ఇది మున్సిపల్ ఎన్నికల పోలింగ్ సమయంలో ఓట్ల రూపంలో ప్రతికూలంగా మారే ప్రమాదం ఉంది. క్షేత్రస్థాయిలో అధికారులు ప్రజాప్రతినిధుల మాట వినడం లేదనే సంకేతాలు ఓటర్లలోకి వెళ్తే.. ఎన్నికల సమయంలో ప్రభుత్వ యంత్రాంగంపై కూటమి నేతలు పట్టు కోల్పోయే అవకాశం ఉంటుంది. బెజవాడ మున్సిపల్ పీఠాన్ని ఎలాగైనా కైవసం చేసుకోవాలని కూటమి పెద్దలు వ్యూహాలు రచిస్తుంటే.. ఉత్సవాల సమయంలో జరుగుతున్న ఇలాంటి చిన్న చిన్న సమన్వయ లోపాలు, అధికారుల మితిమీరిన పెత్తనం పార్టీకి క్షేత్రస్థాయిలో మైనస్‌గా మారే ప్రమాదం ఉందని హెచ్చరిస్తున్నారు. మరి ఈ అసంతృప్తిని చల్లార్చి, క్యాడర్‌ను స్థానిక పోరుకు సమాయత్తం చేయడంలో బెజవాడ కూటమి నేతలు ఎలాంటి చర్యలు తీసుకుంటారో చూడాలి.
The post ఇంద్రకీలాద్రిపై ఎంపీ, ఎమ్మెల్యేలకు విలువ లేదా..? appeared first on Telugu Rajyam.
