Justin Greaves Ruled Out From 2nd ODI vs India: భారత్‌తో జరుగుతున్న మూడు వన్డేల సిరీస్‌లో ఇప్పటికే 0-1తో వెనుకబడిన వెస్టిండీస్‌కు మరో ఎదురుదెబ్బ తగిలింది. స్టార్ ఓపెనర్, సెంచరీ హీరో జస్టిన్ గ్రీవ్స్ గాయం కారణంగా రెండో వన్డే మ్యాచ్‌కు దూరమయ్యాడు. కాలి కండరం గాయం కారణంగా అతడు కీలక మ్యాచ్‌కు దూరం అయ్యాడు. గ్రీవ్స్ స్థానంలో యువ ఆటగాడు జ్యువెల్ ఆండ్రూను బ్యాటింగ్ ఆర్డర్‌లో ముందుకు పంపే అవకాశాలు ఉన్నాయి. రెండో వన్డే ఈరోజు మధ్యాహ్నం గువాహటిలో జరగనుంది.
తిరువనంతపురంలో జరిగిన తొలి వన్డేలో జస్టిన్ గ్రీవ్స్ అద్భుతమైన బ్యాటింగ్‌తో అలరించాడు. 108 బంతుల్లో 101 పరుగులు చేశాడు. ఇది అతడి కెరీర్‌లో తొలి వన్డే సెంచరీ కావడం విశేషం. అయితే ఈ ఇన్నింగ్స్ సమయంలోనే గ్రీవ్స్ కాలి కండరానికి గాయం అయింది. మ్యాచ్ అనంతరం నిర్వహించిన పరీక్షల్లో గాయం తీవ్రత ఎక్కువగా ఉండడంతో.. రెండో వన్డేకు అతడిని దూరంగా ఉంచాలని వెస్టిండీస్ క్రికెట్ నిర్ణయించింది. గ్రీవ్స్ రెండో వన్డేకు అందుబాటులో ఉండడని క్రికెట్ వెస్టిండీస్ వెల్లడించింది.
తొలి వన్డేలో బ్రాండన్ కింగ్‌తో కలిసి గ్రీవ్స్ తొలి వికెట్‌కు 135 పరుగుల భాగస్వామ్యాన్ని నెలకొల్పాడు. దీంతో వెస్టిండీస్ భారీ స్కోరుకు బలమైన పునాది పడింది. అనంతరం అమీర్ జాంగూ కూడా రాణించడంతో విండీస్ 50 ఓవర్లలో 295/7 పరుగులు చేసింది. అయితే విరాట్ కోహ్లీ, శుభ్‌మన్ గిల్ సెంచరీలతో చెలరేగడంతో భారత్ 41.4 ఓవర్లలోనే లక్ష్యాన్ని ఛేదించి 8 వికెట్ల తేడాతో విజయం సాధించింది. దీంతో మూడు మ్యాచ్‌ల సిరీస్‌లో టీమిండియా 1-0 ఆధిక్యంలోకి వెళ్లింది. ఇప్పుడు సిరీస్‌ను సమం చేయాలంటే రెండో వన్డేలో వెస్టిండీస్ తప్పక గెలవాల్సి ఉంది. ఇలాంటి కీలక సమయంలో ఫామ్‌లో ఉన్న గ్రీవ్స్ దూరం కావడం ఆ జట్టుకు పెద్ద లోటుగా మారింది. తొలి వన్డేలో టీమిండియా బౌలర్లపై గ్రీవ్స్ చెలరేగిన విషయం తెలిసిందే.
