తిరుమలలో కర్ణాటక సత్రాల నిర్వహణ వ్యవహారం వివాదాస్పదంగా మారింది. భక్తుల వసతి కోసం ఏర్పాటు చేసిన కర్ణాటక సత్రాలను పర్యాటక అభివృద్ధి సంస్థకు అప్పగించడంపై అభ్యమతరాలు వ్యక్తమవుతున్నాయి.ఏడున్నర ఎకరాల భూమిలో నిర్మించిన భవనాలకు టీటీడీ అనుమతులు ఉన్నాయా..? గత ప్రభుత్వ హయాంలో కుదిరిన ఒప్పందాలేంటి అంటూ ప్రశ్నించారు టీటీడీ పాలకమండలి సభ్యుడు భాను ప్రకాష్ రెడ్డి.
తిరుమల శ్రీవారి ఆలయానికి సమీపంలో ఉన్న కర్ణాటక ప్రవాస సౌధాలు ఇప్పుడు వివాదానికి కేంద్రంగా మారాయి. మైసూరు మహారాజుల కాలం నుంచి తిరుమలతో కర్ణాటకకు ప్రత్యేక అనుబంధం ఉంది. ఆ అనుబంధంతోనే భక్తుల వసతి కోసం కర్ణాటక సత్రాలు ఏర్పాటయ్యాయి.
అయితే ఈ సత్రాల నిర్వహణ బాధ్యతలను దేవాదాయ శాఖ నుంచి కర్ణాటక పర్యాటక అభివృద్ధి సంస్థకు అప్పగించాలని ఆ రాష్ట్ర ప్రభుత్వం నిర్ణయించినట్లు సమాచారం. ఇప్పటికే పర్యాటక సంస్థ అధికారులు నిర్వహణ బాధ్యతలు చేపట్టేందుకు చర్యలు ప్రారంభించినట్లు తెలుస్తోంది. దీంతో భక్తుల కోసం ఏర్పాటు చేసిన సత్రాలను పర్యాటక సంస్థకు అప్పగించడం ఎంతవరకు సమంజసమనే ప్రశ్నలు తలెత్తుతున్నాయి.
ఇదిలా ఉండగా కర్ణాటక సత్రాల నిర్వహణ మార్పుపై టీటీడీ ఈవో రవిచంద్ర, అదనపు ఈవో వెంకయ్య చౌదరి వివరాలు కోరినట్లు సమాచారం. గతంలో కుదిరిన ఒప్పందాలు, భూమి కేటాయింపు పత్రాలు, నిర్మాణ అనుమతులను పరిశీలించిన తర్వాతే నిర్ణయం తీసుకునే అవకాశం ఉన్నట్లు తెలుస్తోంది. ఈ వ్యవహారంలో కర్ణాటక ప్రభుత్వం, టీటీడీ నుంచి అధికారిక స్పష్టత రావాల్సి ఉంది.
