- మంత్రి తుమ్మల నాగేశ్వరరావు వెల్లడి
ఖమ్మం టౌన్‌, వెలుగు: ఖమ్మం నగరంలోని అల్లీపురంలో తిరుమల తిరుపతి దేవస్థానం(టీటీడీ) ఆధ్వర్యంలో శ్రీవేంకటేశ్వర స్వామి ఆలయం నిర్మించనున్నట్లు మంత్రి తుమ్మల నాగేశ్వరరావు తెలిపారు. శనివారం అల్లీపురం వద్ద ఆలయ నిర్మాణానికి కేటాయించిన స్థలాన్ని సుడా చైర్మన్‌ పువ్వాళ్ల దుర్గాప్రసాద్‌, అడిషనల్ కలెక్టర్‌ పి.శ్రీనివాసరెడ్డి, ఖమ్మం మున్సిపల్‌ కమిషనర్‌ అభిషేక్‌ అగస్త్యతో కలిసి తుమ్మల పరిశీలించారు.
ఈ సందర్భంగా మాట్లాడుతూ.. సుమారు 20 ఎకరాల విస్తీర్ణంలో ఆలయాన్ని నిర్మించనున్నట్లు తెలిపారు. దీనికి కేటాయించిన భూమి విలువ సుమారు రూ.100 కోట్ల వరకు ఉంటుందని చెప్పారు. భూసేకరణను విజయవంతంగా పూర్తి చేసిన అడిషనల్ కలెక్టర్‌ శ్రీనివాసరెడ్డిని అభినందించారు. ఈ నెల 12న ఆలయ నిర్మాణానికి భూమిపూజ నిర్వహించనున్నట్లు తెలిపారు.
