Ovarian Cancer | అండాశయ క్యాన్సర్ చికిత్సలో వ్యాధి శరీరంలో ఎంతవరకు వ్యాపించిందో ముందుగానే క‌చ్చితంగా తెలుసుకోవడం చాలా కీలకం. ముఖ్యంగా పొత్తికడుపులోని అవయవాలను కప్పి ఉండే పలుచని పొర అయిన పెరిటోనియంలోకి క్యాన్సర్ వ్యాపించినప్పుడు చిన్నచిన్న కణితి ముద్దలను సాధారణ స్కాన్ల ద్వారా గుర్తించడం కొన్నిసార్లు కష్టంగా ఉంటుంది. ఈ నేపథ్యంలో 68Ga-Ga-FAPI-04 PET/CT లేదా FAPI PET అనే కొత్త తరహా స్కాన్‌ అండాశయ క్యాన్సర్ వ్యాప్తిని మరింత స్పష్టంగా గుర్తించేందుకు ఉపయోగపడే అవకాశాలు కనిపిస్తున్నాయి. బెంగళూరులో 200 మంది అండాశయ క్యాన్సర్ బాధితులపై నిర్వహించిన అధ్యయనంలో సాధారణ కాంట్రాస్ట్‌ సీటీ స్కాన్‌తో పోలిస్తే FAPI PET మెరుగైన ఫలితాలను చూపించింది.
వ్యాధి తీవ్రతను 39 పాయింట్లతో అంచనా..
అండాశయ క్యాన్సర్ నిర్ధారణ సమయంలో 70 శాతానికి పైగా కేసుల్లో పెరిటోనియంలోకి క్యాన్సర్ వ్యాప్తి ఉన్నట్లు అధ్యయనం వెల్లడించింది. దీనివల్ల పొత్తికడుపు ఉబ్బరం, నొప్పి, మల విసర్జనలో మార్పులు వంటి సమస్యలు వ‌చ్చే అవ‌కాశం ఉంది. అయితే లక్షణాలను బట్టి మాత్రమే వ్యాధి ఎంతవరకు వ్యాపించిందో అంచనా వేయడం సాధ్యం కాదు. అందుకే వైద్యులు పెరిటోనియల్‌ క్యాన్సర్ ఇండెక్స్‌ ద్వారా పొత్తికడుపులోని 13 ప్రాంతాలను పరిశీలించి, వ్యాధి తీవ్రతను గరిష్ఠంగా 39 పాయింట్ల వరకు అంచనా వేస్తారు. ముఖ్యంగా పేగులు, మెసెంటరీ, పొత్తికడుపు పైభాగంలోని కొన్ని ప్రాంతాల్లో క్యాన్సర్ ఉంటే పూర్తిగా తొలగించడం కష్టమవుతుంది. స్కాన్‌లో వ్యాధి తీవ్రత తక్కువగా కనిపిస్తే, శస్త్రచికిత్స సమయంలో పూర్తిగా తొలగించడం సాధ్యం కాదని తేలే పరిస్థితి ఏర్పడుతుంది.
అధిక క‌చ్చిత‌త్వంతో ఫ‌లితాలు..
బెంగళూరులో మే 2024 నుంచి ఏప్రిల్‌ 2025 మధ్య నిర్వహించిన అధ్యయనంలో ప్రతి ఒక్కరికీ FAPI PET/CT, సాధారణ కాంట్రాస్ట్‌ సీటీ రెండింటినీ చేశారు. శస్త్రచికిత్స సమయంలో కనిపించిన వ్యాధి స్థితితో స్కాన్‌ ఫలితాలను పోల్చారు. పెరిటోనియంలో క్యాన్సర్‌ను గుర్తించడంలో FAPI PET సున్నితత్వం 81.8 శాతంగా ఉండగా, సాధారణ సీటీకి ఇది 54.6 శాతంగా ఉంది. మొత్తం నిర్ధారణ క‌చ్చితత్వం FAPI PETలో 86 శాతం, సీటీలో 78 శాతంగా నమోదైంది. ముఖ్యంగా పొత్తికడుపు పైభాగంలో FAPI PET సున్నితత్వం 76.5 శాతంగా ఉండగా, సీటీలో కేవలం 23.5 శాతంగా ఉంది. చిన్న పేగు, మెసెంటరీ ప్రాంతాల్లోనూ FAPI PET మెరుగ్గా క్యాన్సర్‌ను గుర్తించింది. సాధారణ సీటీతో పోలిస్తే క్యాన్సర్ వ్యాప్తిని FAPI PET మరింత దగ్గరగా అంచనా వేసినట్లు అధ్యయనం తెలిపింది.
ఫైబ్రోబ్లాస్ట్ యాక్టివేషన్ ప్రోటీన్ లక్ష్యంగా..
FAPI PET ప్రత్యేకత ఏమిటంటే, ఇది కేవలం కణితి పరిమాణం, ఆకారంపై ఆధారపడకుండా క్యాన్సర్ చుట్టూ ఉండే కణజాలంలోని ఫైబ్రోబ్లాస్ట్ యాక్టివేషన్ ప్రోటీన్ ను లక్ష్యంగా చేసుకుంటుంది. సాధారణ పేగుల్లో దీని శోషణ తక్కువగా ఉండడం, పరీక్షకు ముందు ఉపవాసం అవసరం లేకపోవడం వంటి ప్రయోజనాలు కూడా ఉన్నాయి. అయితే ప్రస్తుతం ఇది సాధారణ స్కాన్లు, శస్త్రచికిత్స సమయంలో చేసే అంచనా లేదా వైద్య బృందం నిర్ణయానికి ప్రత్యామ్నాయం కాదు. ఈ పరిశోధన ఒకే కేంద్రంలో నిర్వహించబడడం, ఎక్కువ మంది రోగులకు స్కాన్‌కు ముందు కీమోథెరపీ ఇవ్వడం వంటి పరిమితులు ఉన్నాయి. FAPI PET వల్ల అవసరం లేని శస్త్రచికిత్సలు నిజంగా ఎంతవరకు తగ్గుతాయో తెలుసుకోవడానికి మరిన్ని పెద్దస్థాయి పరిశోధనలు అవసరమని అధ్యయనం పేర్కొంది.
