ఏపీలో స్థానిక సంస్థల ఎన్నికల నగారా మోగడానికి సర్వం సిద్ధమవుతున్న వేళ, అభ్యర్థుల ఎంపికతో పాటు మున్సిపల్, జడ్పీ చైర్మన్ స్థానాలపై రాజకీయ వర్గాల్లో ఊహాగానాలు ఊపందుకున్నాయి. ఈ క్రమంలోనే అనంతపురం జిల్లా రాజకీయాల్లో అత్యంత బలమైన ముద్ర కలిగిన పరిటాల కుటుంబ వారసుడు, టీడీపీ యువ నేత పరిటాల శ్రీరామ్ రాజకీయ భవిష్యత్తుపై పొలిటికల్ సర్కిల్స్‌లో ఒక ఊహాగానం గట్టిగా వినిపిస్తోంది. 2019 సార్వత్రిక ఎన్నికల్లో రాప్తాడు నియోజకవర్గం నుండి పోటీ చేసి ఓడిపోయిన శ్రీరామ్‌కు, ఈ లోకల్ బాడీ ఎన్నికల ద్వారా ముఖ్యమంత్రి చంద్రబాబు నాయుడు జిల్లా పరిషత్ చైర్మన్ పీఠాన్ని అప్పగించబోతున్నారనే వార్తలు అనంతపురం జిల్లాలో హాట్ టాపిక్‌గా మారాయి.
ప్రభుత్వం తాజాగా విడుదల చేసిన జిల్లా పరిషత్ చైర్మన్ల రిజర్వేషన్ల అధికారిక జాబితా ఈ ఊహాగానాలకు మరింత బలాన్ని చేకూరుస్తోంది. గత 2021 స్థానిక ఎన్నికల్లో అనంతపురం జడ్పీ చైర్మన్ పీఠం బీసీ మహిళకు రిజర్వ్ కాగా, తాజా రిజర్వేషన్ల కసరత్తులో భాగంగా అనంతపురం జడ్పీ స్థానం జనరల్ కేటగిరీకి దక్కింది. దీంతో ఈసారి జనరల్ స్థానం నుంచి పరిటాల శ్రీరామ్‌ను బరిలోకి దించేందుకు అధిష్ఠానం సుముఖంగా ఉన్నట్లు టాక్ నడుస్తోంది. 2024 సార్వత్రిక ఎన్నికల్లో ఒకే కుటుంబానికి రెండు టికెట్లు ఇవ్వలేమనే నిబంధనతో శ్రీరామ్ త్యాగం చేయాల్సి వచ్చింది.
ఆ ఎన్నికల్లో ఆయన తల్లి పరిటాల సునీత రాప్తాడు ఎమ్మెల్యేగా విజయం సాధించారు. నాడు సీటు కోల్పోయిన శ్రీరామ్‌కు ఇప్పుడు జడ్పీ చైర్మన్ పదవి ద్వారా సముచిత న్యాయం చేయాలని టీడీపీ అగ్రనాయకత్వం భావిస్తున్నట్లు తెలుస్తోంది. రాజకీయ వర్గాల అంతర్గత సమాచారం ప్రకారం, పరిటాల కుటుంబానికి బలమైన పట్టున్న రాప్తాడు లేదా కనగానపల్లి నియోజకవర్గ పరిధిలోని ఏదైనా ఒక సురక్షితమైన మండలం నుండి పరిటాల శ్రీరామ్‌ను జెడ్‌పీటీసీ అభ్యర్థిగా పోటీ చేయించి, ఆ తర్వాత జిల్లా పరిషత్ చైర్మన్ పీఠంపై కూర్చోబెట్టేలా ఒక మాస్టర్ ప్లాన్ సిద్ధమైనట్లు ప్రచారం జరుగుతోంది. ఒకవేళ ఇదే గనుక నిజమైతే.. తల్లి పరిటాల సునీత ఎమ్మెల్యేగా నియోజకవర్గాన్ని చూసుకుంటే, కొడుకు పరిటాల శ్రీరామ్ జడ్పీ చైర్మన్‌గా జిల్లా మొత్తాన్ని శాసించే అవకాశం లభిస్తుంది. ఈ సరికొత్త సమీకరణం అనంతపురం జిల్లాలో కూటమి శ్రేణుల్లో సరికొత్త ఉత్సాహాన్ని నింపుతోంది.
The post అనంతపురం జడ్పీ పీఠంపై పరిటాల ఫ్యామిలీ..? appeared first on Telugu Rajyam.
