ఆంధ్రప్రదేశ్‌లో సార్వత్రిక ఎన్నికల విజయ ఢంకా తర్వాత కూటమి భాగస్వామిగా ఉన్న జనసేన పార్టీ త్వరలో జరగబోయే స్థానిక సంస్థల ఎన్నికలపై ప్రత్యేక దృష్టి సారించింది. గ్రామ, మండల స్థాయి నుండి పార్టీ ఉనికిని మరింత బలోపేతం చేయడానికి మరియు సమర్థవంతమైన అభ్యర్థులను రంగంలోకి దించడానికి వీలుగా కొత్త కమిటీలను నియమించాలని జనసేన అధినేత పవన్ కల్యాణ్ నిర్ణయించారు. ఇందులో భాగంగా, పార్లమెంట్ నియోజకవర్గాల వారీగా సమన్వయ ప్రక్రియను మరింత వేగవంతం చేసేందుకు ఈ నూతన కమిటీలు త్వరలోనే అధికారికంగా విధుల్లోకి రానున్నాయి.
నూతన కమిటీల ఏర్పాటు నేపథ్యంలో జనసేన అధినాయకత్వం ఒక సంచలన నిర్ణయం తీసుకుంది. గతంలో 25 మంది సభ్యులతో నియమించిన పాత పార్లమెంట్ కమిటీలను పూర్తిగా రద్దు చేస్తున్నట్లు పవన్ కల్యాణ్ ప్రకటించారు. మారుతున్న రాజకీయ సమీకరణాలు, క్షేత్రస్థాయి అవసరాలకు అనుగుణంగా మరింత యాక్టివ్‌గా ఉండే నాయకులకు ఈ కొత్త కమిటీలలో స్థానం కల్పించనున్నారు. అయితే, గతంలో నియమించిన ప్రచార కమిటీలు మాత్రం ఎలాంటి మార్పులు లేకుండా యథావిధిగా కొనసాగుతాయని పార్టీ స్పష్టం చేసింది.
సార్వత్రిక ఎన్నికల్లో 100 శాతం స్ట్రైక్ రేట్‌తో దూసుకుపోయిన జనసేన, అదే ఊపును స్థానిక సంస్థల ఎన్నికల్లోనూ ప్రదర్శించాలని భావిస్తోంది. కొత్తగా వచ్చే కమిటీల ద్వారా అటు కూటమి ధర్మాన్ని పక్కాగా పాటిస్తూనే.. ఇటు క్షేత్రస్థాయిలో జనసేన ఓటు బ్యాంక్ చెల్లాచెదురు కాకుండా రూట్ మ్యాప్ సిద్ధం చేస్తున్నారు. పాత కమిటీల రద్దు మరియు కొత్త రక్తాన్ని ఎక్కించే ఈ ప్రక్రియతో జనసేన కేడర్‌లో సరికొత్త జోష్ నెలకొంది. రాబోయే కొద్ది రోజుల్లోనే పార్లమెంట్ నియోజకవర్గాల వారీగా కొత్త బాధ్యుల జాబితాను జనసేన కేంద్ర కార్యాలయం విడుదల చేయనుంది.
The post పవన్ కళ్యాణ్ మరో సంచలన నిర్ణయం..! appeared first on Telugu Rajyam.
