నాగర్కర్నూల్, వెలుగు : పంజాబ్ నేషనల్ బ్యాంక్ వినియోగదారులు, ఖాతాదారులకు సులభమైన విధానంలో నాణ్యమైన, నమ్మకమైన సేవలందిస్తామని బ్యాంక్ హైదరాబాద్ జోనల్ హెడ్ జనరల్ మేనేజర్ వందన పాండే అన్నారు. నాగర్ కర్నూల్ జిల్లా కేంద్రంలో కొత్త శాఖ ప్రారంభించడం ద్వారా స్థానికులు, వ్యాపార, వాణిజ్యవర్గాలు, వివిధ సంస్థలకు తమ బ్యాంకు ద్వారా సేవలందిస్తామని ఆమె భరోసా ఇచ్చారు. మంగళవారం జిల్లా కేంద్రంలో జిల్లా కలెక్టర్ హేమంత కేశవ పాటిల్, సర్కిల్హెడ్ అరవింద్ కల్ర, మున్సిపల్ చైర్మన్ తీగల సునేంద్ర తదితరులతో కలిసి పంజాబ్ నేషనల్బ్యాంక్ 79వ బ్రాంచిని ప్రారంభించారు.
హైదరాబాద్ సర్కిల్ పరిధిలో 78 బ్యాంక్ బ్రాంచిల ద్వారా వినియోగదారులకు సేవలందించడంలో పంజాబ్ నేషనల్ బ్యాంకు ముందుందని వారు తెలిపారు. కలెక్టర్ హేమంత కేశవ పాటిల్మాట్లాడుతూ పంజాబ్ నేషనల్ బ్యాంక్ జిల్లా కేంద్రంలో ప్రారంభించిన కొత్త బ్రాంచి ద్వారా వినియోగదారులకు బ్యాంకింగ్ సేవలతో పాటు ఆర్థిక, సామాజిక సేవలకు తోడ్పాటునివ్వాలని కోరారు. సర్కిల్హెడ్ కల్ర మాట్లాడుతూ వినియోగదారులకు తమ బ్రాంచిలో ఆధునిక డిజిటల్ సేవా సదుపాయాలతో పాటు వినియోగదారుల నమ్మకాన్నీ చూరగొనేలా పనిచేస్తామన్నారు. లోకల్ బ్రాంచి మేనేజర్ హరీశ్బాబు పాల్గొన్నారు.
