మాజీ DSP భీంరెడ్డి బినామీ ఇళ్లల్లో గుట్టలుగా నోట్ల కట్టలు

మాజీ డీఎస్పీ భీంరెడ్డి అక్రమ ఆస్తుల కేసులో పురోగతి సాధించారు ఏసీబీ అధికారులు. 2026 సెప్టెంబర్ 24న ఏకకాలంలో ఆయన బినామీ ఇళ్లల్లో సోదాలు నిర్వహించారు. మొత్తం 8 మంది బినామీలు ఉన్నట్లు గుర్తించిన అధికారులు రైడ్స్ నిర్వహించారు. గుట్టలు గుట్టలుగా నోట్ల కట్టలు బయట పడటం చూసి అధికారులు షాకవుతున్నారు.

అక్రమ ఆస్తుల కేసులో భీంరెడ్డితో పాటు అతని బినామీలుగా అనుమానిస్తున్న 8 మంది ఇళ్లల్లో దాడులు చేశారు అధికారులు. ఏసీబీ డీఎస్పీ గంగసాని శ్రీధర్ ఆధ్వర్యంలో సోదాలు జరుగుతున్నాయి. హైదరాబాద్ పుప్పాలగూడలో భీంరెడ్డి బినామీల ఇళ్లల్లో భారీ ఎత్తున డబ్బు, విదేశీ కరెన్సీని గుర్తించారు అధికారులు.

ఆదాయానికి మించిన ఆస్తుల కేసులో గతంలో భీంరెడ్డిని ఏసీబీ అరెస్టు చేసింది. ఆయనకు 2 వందల కోట్ల రూపాయలకు పైగా అక్రమ ఆస్తులు ఉన్నట్లు ఏసీబీ గుర్తించింది.