రాష్ట్రంలో మరియు దేశవ్యాప్తంగా ‘వందేమాతరం’ గీతాలాపన చుట్టూ జరుగుతున్న రాజకీయ హడావుడికి సుప్రీంకోర్టు ఇవాళ బ్రేక్ వేసింది. కేంద్ర ప్రభుత్వం ఇటీవల వందేమాతరం అధికారిక ఆరు చరణాల ఆలాపనను తప్పనిసరి చేస్తూ, పాడకపోతే శిక్షార్హమనేలా తెచ్చిన నిబంధనలపై భారత సర్వోన్నత న్యాయస్థానం తీవ్రంగా స్పందించింది. ఇన్నాళ్లూ వందేమాతరాన్ని అస్త్రంగా చేసుకుని సోషల్ మీడియాలో విపరీతంగా హడావుడి చేస్తూ, పాడని వారిని టార్గెట్ చేసిన బీజేపీ శ్రేణులకు కోర్టు ఇచ్చిన తాజా ఆదేశాలు పెద్ద షాక్‌గా మారాయి.
ప్రముఖ కర్ణాటక సంగీత విద్వాంసుడు టి.ఎం.కృష్ణ దాఖలు చేసిన పిటిషన్‌పై విచారణ జరిపిన చీఫ్ జస్టిస్ సూర్యకాంత్ ధర్మాసనం.. వందేమాతరం గీతంలో ఎన్ని చరణాలు పాడాలనేది పూర్తిగా పౌరుల వ్యక్తిగత నిర్ణయమని తేల్చి చెప్పింది. వందేమాతరంలోని చివరి నాలుగు చరణాలలో హిందూ దేవతల ప్రస్తావన ఉందని, వాటిని అందరితో బలవంతంగా పాడించడం రాజ్యాంగ లౌకికతత్వానికి మరియు పౌరుల మత విశ్వాసాలకు విరుద్ధమన్న పిటిషనర్ వాదనను కోర్టు పరిగణనలోకి తీసుకుంది. ఎవరైనా తమ మత విశ్వాసాల ప్రకారం కొన్ని చరణాలను పాడటానికి నిరాకరిస్తే, వారిపై కేంద్ర ప్రభుత్వం చట్టాల పేరిట ఎలాంటి శిక్షాత్మక చర్యలు తీసుకోలేదని సుప్రీంకోర్టు స్పష్టం చేసింది.
గతంలో 1986 నాటి చారిత్రాత్మక ‘బిజోయ్ ఇమ్మాన్యుయేల్’ కేసు తీర్పును ఈ సందర్భంగా గుర్తు చేసిన సుప్రీంకోర్టు, మతపరమైన అభ్యంతరాల వల్ల జాతీయ గీతాన్ని పాడకుండా గౌరవప్రదంగా నిల్చున్న విద్యార్థులను శిక్షించలేమని నాడే స్పష్టం చేశామని పేర్కొంది. ఇప్పుడు వందేమాతరం విషయంలోనూ అదే సూత్రం వర్తిస్తుందని చెప్తూ.. బలవంతపు దేశభక్తి చట్టబద్ధం కాదని స్పష్టం చేసింది. ఈ సవరణ చట్టం మరియు మార్గదర్శకాలపై రెండు వారాల్లోగా పూర్తి వివరణ ఇవ్వాలంటూ కేంద్ర ప్రభుత్వానికి కోర్టు నోటీసులు జారీ చేసింది. కోర్టు దెబ్బకు ఈ అంశాన్ని పొలిటికల్ అస్త్రంగా వాడుకుందామని చూసిన సోషల్ మీడియా మూకలు ఒక్కసారిగా డిఫెన్స్‌లో పడిపోయాయి.
The post బీజేపీ సోషల్ మీడియాకు సుప్రీం షాక్..! appeared first on Telugu Rajyam.
