ఆంధ్రప్రదేశ్ రాజకీయాల్లో, ముఖ్యంగా బెజవాడ కేంద్రంగా మళ్లీ వంగవీటి మార్కు రాజకీయం ఆసక్తిని రేపుతోంది. మాజీ ఎమ్మెల్యే వంగవీటి రాధాకృష్ణ మంగళగిరిలోని జనసేన పార్టీ క్యాంపు కార్యాలయంలో డిప్యూటీ సీఎం పవన్ కళ్యాణ్‌ను ఆకస్మికంగా కలవడం తీవ్ర రాజకీయ దుమారం రేపుతోంది. గత కొంతకాలంగా తెలుగుదేశం పార్టీలో ఉంటూ, పెద్దగా యాక్టివ్‌గా లేని వంగవీటి రాధా.. ఇప్పుడు సడెన్‌గా పవన్ కళ్యాణ్‌ను కలవడం వెనుక కేవలం మర్యాదపూర్వక భేటీ మాత్రమే లేదని, ఆయన మళ్లీ పార్టీ మారేందుకు సిద్ధమయ్యారనే వార్తలు పొలిటికల్ సర్కిల్స్‌లో గుప్పుమంటున్నాయి.
గత ఎన్నికల్లో టీడీపీ తరఫున ప్రచారం చేసినప్పటికీ, రాధాకు పార్టీలో ఆశించిన స్థాయిలో ప్రాధాన్యత దక్కలేదనే అసంతృప్తి ఆయన అనుచరుల్లో చాలా కాలంగా ఉంది. పైగా రాబోయే స్థానిక సంస్థల ఎన్నికల్లో గానీ, భవిష్యత్ సమీకరణాల్లో గానీ టీడీపీ నుంచి తనకు సరైన హామీ లభించకపోవడంతోనే రాధా రూట్ మారుస్తున్నట్లు తెలుస్తోంది. గతంలో ప్రజారాజ్యం పార్టీ రోజుల్లో పవన్ కళ్యాణ్‌తో కలిసి పనిచేసిన పాత సాన్నిహిత్యం ఉండటంతో, టీడీపీకి గుడ్ బై చెప్పేసి అధికారికంగా జనసేన కండువా కప్పుకోవడానికి ఆయన ముహూర్తం ఫిక్స్ చేసుకున్నారనే ప్రచారం జోరందుకుంది.
ప్రస్తుతం విజయవాడ మేయర్ స్థానాన్ని జనసేనకు కేటాయించాలని పవన్ కళ్యాణ్ పట్టుబడుతున్నట్లు వార్తలు వస్తున్న తరుణంలో, రాధా జనసేన వైపు చూడటం వెనుక పెద్ద వ్యూహమే ఉందని విశ్లేషకులు భావిస్తున్నారు. టీడీపీలో ఉంటే కేశినేని చిన్ని వంటి బలమైన నేతల సమీకరణాల మధ్య సీటు దక్కడం కష్టమని భావిస్తున్న రాధా.. జనసేనలో చేరితే పవన్ ఆశీస్సులతో కూటమి ఉమ్మడి మేయర్ అభ్యర్థిగా సులభంగా బరిలోకి దిగొచ్చనే ప్లాన్‌లో ఉన్నట్లు టాక్. వంగవీటి కుటుంబానికి బెజవాడలో ఉన్న కాపు సామాజికవర్గ ఓటు బ్యాంక్, జనసేన ఇమేజ్ కలిస్తే తిరుగుండదని ఆయన భావిస్తున్నట్లు సమాచారం.
ఒకవేళ వంగవీటి రాధా నిజంగానే జనసేనలో చేరితే, ఆయన రాజకీయ ప్రస్థానంలో ఇది మరో ప్రధాన మలుపు అవుతుంది. గతంలో కాంగ్రెస్ నుంచి వైఎస్సార్ కాంగ్రెస్, ఆ తర్వాత ప్రజారాజ్యం, మళ్లీ వైసీపీ, ఆపై టీడీపీ.. ఇలా పలు పార్టీలు మారిన చరిత్ర రాధాకు ఉంది. ఇప్పుడు తాజాగా జనసేన గూటికి చేరితే, ఆయన పొలిటికల్ జంపింగ్‌లపై ప్రత్యర్థులు విమర్శలు గుప్పించే అవకాశం ఉన్నప్పటికీ.. బెజవాడ కార్పొరేషన్ ఎన్నికల నాటికి కూటమిలో ఇది సరికొత్త సమీకరణాలకు మరియు అంతర్గత విభేదాలకు దారితీయడం ఖాయంగా కనిపిస్తోంది.
The post మళ్ళీ జెండా మారుస్తున్న వంగవీటి వారసుడు..? appeared first on Telugu Rajyam.
