విజయవాడ రాజకీయాల్లో ఎప్పుడు ఏ మలుపు తిరుగుతుందో ఎవరికీ అర్థం కాదు. తాజాగా మాజీ ఎమ్మెల్యే వంగవీటి రాధాకృష్ణ తెలుగుదేశం పార్టీని వీడి జనసేన వైపు అడుగులు వేస్తుండటం వెనుక రెండేళ్ళ రాజకీయ వ్యూహాలు ఉన్నాయనే చర్చ నడుస్తోంది. అయితే, ఈ హఠాత్ పరిణామంపై విజయవాడ నగర టీడీపీ శ్రేణులు భిన్నంగా స్పందిస్తున్నాయి. రాధా ఇప్పుడు జనసేన వైపు వెళ్లడం వెనుక గతంలో టీడీపీ అధిష్ఠానం ఆయనకు ఎమ్మెల్సీ ఇవ్వకుండా పక్కన పెట్టడమే ప్రధాన కారణమని స్థానిక తమ్ముళ్లు బలంగా నమ్ముతున్నారు.
నిజానికి 2019 ఎన్నికల ముందే వంగవీటి రాధా వైసీపీని వీడి తెలుగుదేశం పార్టీలో చేరారు. ఆ సమయంలో ఆయనకు పార్టీలో సముచిత స్థానం కల్పిస్తామని, భవిష్యత్తులో ఎమ్మెల్సీ ఇచ్చి గౌరవిస్తామని చంద్రబాబు హామీ ఇచ్చారనే ప్రచారం జరిగింది. కానీ, 2024లో కూటమి ప్రభుత్వం అధికారంలోకి వచ్చిన తర్వాత జరిగిన రాజకీయ సమీకరణాలు, వివిధ సామాజిక వర్గాల లెక్కల వల్ల రాధాకు ఆశించిన పదవి దక్కలేదు. దీంతో గత కొంతకాలంగా పార్టీ కార్యక్రమాలకు దూరంగా ఉంటూ వస్తున్న రాధా, సరైన సమయం చూసి పవన్ కళ్యాణ్ సమక్షంలో జనసేన కండువా కప్పుకున్నారని పొలిటికల్ సర్కిల్స్ లో వినిపిస్తున్న మాట.
ప్రస్తుతం విజయవాడ మేయర్ సీటును జనసేనకు కేటాయించే యోచనలో కూటమి అధిష్ఠానం ఉందనే వార్తలు వస్తున్నాయి. వంగవీటి రాధాను జనసేన తరఫున బెజవాడ మేయర్ అభ్యర్థిగా బరిలోకి దించితే కాపు, రజక, దళిత సామాజిక వర్గాల మద్దతుతో క్లీన్ స్వీప్ చేయవచ్చని పవన్ కళ్యాణ్ భావిస్తున్నట్లు తెలుస్తోంది. అయితే, టీడీపీ కార్యకర్తలు మాత్రం నాడే చంద్రబాబు రాధాకు ఎమ్మెల్సీ ఇచ్చి ఉంటే, ఈరోజు విజయవాడలో ఇంత బలమైన సీటును జనసేనకు వదులుకోవాల్సిన పరిస్థితి వచ్చేది కాదు కదా అని ప్రశ్నిస్తున్నారు. ఈ పాత అసంతృప్తి జ్వాలలు రాబోయే స్థానిక ఎన్నికల్లో కూటమి విజయవకాశాలపై ఎలాంటి ప్రభావం చూపుతాయో చూడాలి.
The post నాడే ఎమ్మెల్సీ ఇవ్వకపోవడం వల్లే నేడు మేయర్ సీటు..? appeared first on Telugu Rajyam.
