యూపీఐ చెల్లింపులపై ఛార్జీలు వసూలు చేస్తారన్న వార్త దేశ వ్యాప్తంగా వినియోగదారులను ఆందోళనకు గురిచేసింది. అయితే రెండు వేల రూపాయలకు పైగా చెల్లింపులపై ఎండీఆర్ చెల్లించాలనటంతో కస్టమర్లు టెన్షన్ కు గురయ్యారు. ఈ నిబంధన మర్చంట్స్ కే వర్తిస్తుందనటంతో కాస్త శాంతించినప్పటికీ.. దీనిపై అనేక అనుమానాలు నెలకొన్నాయి. ముఖ్యంగా రూ.2 వేలకు పైగా ధరతో రైల్వే టికెట్ కొంటే ఏంటి పరిస్థితి.. అదనంగా రూ.5 కట్టాల్సిందేనా అనే ప్రశ్నకు క్లారిటీ ఇచ్చింది.
2026 అక్టోబర్ 15 నుంచి కొత్త పేమెంట్ రూల్స్ రానుండటంతో ఎండీఆర్ పై కస్టమర్స్ ఆందోలనకు గురవుతున్నారు. అయితే ఇప్పుడు మీరు రెండు వేల రూపాయలకు పైగా చెల్లించి రైల్వే టికెట్ బుక్ చేసినప్పుడు అదనంగా రూ.5 చెల్లించాల్సిందేనా అంటే కాదని అంటోంది కేంద్రం. ఇది మర్చంట్ వైపు మాత్రం వర్తిస్తుందని.. ప్యాసెంజర్ పై ఈ ప్రభావం చూపదని కేంద్రం చెబుతోంది.
కొత్త UPI విధానం ప్రకారం, వ్యాపారులకు చేసే రెండు వేల పైబడిన లావాదేవీలపై 0.4 శాతం మర్చంట్ డిస్కౌంట్ రేటు (MDR) వర్తిస్తుంది. అయితే, రైల్వే టికెటింగ్‌ను ఒక ప్రత్యేక కేటగిరీలో ఉంచారు, ఇక్కడ ప్రతి లావాదేవీకి MDR గరిష్టంగా రూ.5గా నిర్ణయించారు.
కొత్తగా తీసుకొచ్చిన యూపీఐ రూల్స్ తో ప్రయాణికులకు, టిక్కెట్ ధర మారకూడదు. మీ రైల్వే టిక్కెట్ ధర రూ.3 వేలు. మీరు UPI ద్వారా చెల్లిస్తే, కేవలం కొత్త MDR నిబంధన కారణంగా మీకు రూ.3,005 అదనంగా వసూలు చేయకూడదు. ఆ రూ.5 చెల్లింపు-ప్రాసెసింగ్ ఛార్జీని వ్యాపార పక్షమే భరించాలి.
ఎక్కువ రేట్లలో బుకింగ్‌లకు కూడా ఇదే వర్తిస్తుంది. 5 వేల రూపాయలతో రైల్వే టిక్కెట్ బుక్ చేస్తే.. వ్యాపారికే 5 రూపాయల MDR పడుతుంది. సాధారణ వ్యాపారులకు వర్తించే ప్రామాణిక 0.4 శాతం రేటు ప్రకారం, 5 వేల రూపాయల లావాదేవీపై విధించే ఛార్జీ 20 రూపాయలు అవుతుంది. రూ.10 వేల రైల్వే టిక్కెట్‌కు, సాధారణ వ్యాపారి లావాదేవీకి 0.4 శాతం చొప్పున విధించే 40 రూపాయల ఛార్జీకి బదులుగా, MDR ఇప్పటికీ 5 రూపాయలుగానే ఉంటుంది.
