Bigg Boss 10 | బిగ్ బాస్ తెలుగు 10లో శుక్రవారం ఎపిసోడ్ ఆసక్తికర పరిణామాలతో సాగింది. అగ్ని పరీక్షలో పాల్గొన్న అపూర్వ, మిథిలేష్, రామకృష్ణల్లో ఇద్దరికి బిగ్ బాస్ హౌస్‌లోకి అడుగుపెట్టే అవకాశం దక్కింది. అయితే ఈ వైల్డ్ కార్డు ఎంట్రీ సాధారణంగా కాకుండా పలు ట్విస్టులతో జరిగింది. మరోవైపు కొత్తగా వచ్చిన కంటెస్టెంట్లకు కీలక అధికారం ఇవ్వడంతో ఇప్పటికే హౌస్‌లో ఉన్న సభ్యులకు ఊహించని షాక్ తగిలింది. ముందుగా అపూర్వ, మిథిలేష్, రామకృష్ణల్లో ఎవరు హౌస్‌లోకి రావాలనే విషయాన్ని తేల్చేందుకు బిగ్ బాస్ ఇంటి సభ్యులతో ఓటింగ్ నిర్వహించారు. ఎక్కువ ఓట్లు వచ్చిన వారికి అవకాశం దక్కుతుందని అందరూ భావించారు. కానీ బిగ్ బాస్ మాత్రం ఊహించని ట్విస్ట్ ఇచ్చారు. ఎక్కువ ఓట్లు వచ్చిన వారిని కాకుండా తక్కువ ఓట్లు వచ్చిన అపూర్వకు హౌస్‌లోకి ప్రవేశించే అవకాశం కల్పించారు.
అపూర్వ ఎంట్రీ ఖరారైన తర్వాత మిథిలేష్, రామకృష్ణ మధ్య మరో పోటీ పెట్టారు. ఇద్దరికీ సమానమైన ఓట్లు రావడంతో వారిలో ఒకరిని ఎంపిక చేసేందుకు గేమ్ నిర్వహించారు. ఈ పోటీలో మిథిలేష్ విజయం సాధించడంతో ఆయన కూడా హౌస్‌లోకి అడుగుపెట్టేందుకు అర్హత సాధించాడు. దీంతో అపూర్వ, మిథిలేష్ బిగ్ బాస్ తెలుగు 10లో కొత్త వైల్డ్ కార్డు సభ్యులుగా ఎంట్రీ ఇచ్చారు.ఇక హౌస్‌లోకి అడుగుపెట్టిన వెంటనే వీరిద్దరికీ బిగ్ బాస్ కీలక బాధ్యత అప్పగించారు. ప్రస్తుతం కెప్టెన్సీ కంటెండర్లుగా ఉన్న సభ్యుల్లో ఇద్దరిని తొలగించే అధికారం అపూర్వ, మిథిలేష్‌కు ఇచ్చారు. అంతేకాకుండా మిగిలిన కంటెండర్లకు జోడీగా గేమ్ ఆడి ఇమ్యూనిటీ పొందే అవకాశం కూడా కల్పించారు.
అపూర్వ, మిథిలేష్ ఇద్దరూ చర్చించుకుని సృష్టి, అమన్‌లను కెప్టెన్సీ కంటెండర్ రేసు నుంచి తొలగించాలని నిర్ణయించారు. ముందుగా సృష్టి పేరును ప్రకటించారు. ఆమె కోపం వచ్చినప్పుడు నియంత్రణ కోల్పోయే అవకాశం ఉందని, అలాంటి పరిస్థితుల్లో ఆమె కెప్టెన్‌గా ఉండటం సరైనది కాదని వారు కారణం చెప్పారు. అంతకుముందు హౌస్‌లో క్లీనింగ్ విషయంలో అమన్, త్రిగుణ్ మధ్య వాగ్వాదం కూడా జరిగింది. హౌస్ శుభ్రంగా లేదని త్రిగుణ్ చెప్పడంతో క్లీనింగ్ బాధ్యత తీసుకున్న అమన్ అసహనం వ్యక్తం చేశాడు. తనను ఉద్దేశపూర్వకంగా రెచ్చగొడుతున్నారని భావించిన అమన్ తీవ్రంగా స్పందించాడు. ఈ గొడవలో రోహిత్, షాలిని కూడా కలగజేసుకోవడంతో పరిస్థితి మరింత వేడెక్కింది.
మరోవైపు అపూర్వ, మిథిలేష్ సుధీర్‌కు కూడా మద్దతుగా మాట్లాడారు. గతంలో సుధీర్ వ్యాఖ్యలపై హౌస్‌లో జరిగిన వివాదాన్ని ప్రస్తావిస్తూ, అతను చేసిన వ్యాఖ్యను తప్పుగా అర్థం చేసుకున్నారని వారు అభిప్రాయపడ్డారు. ఆ తర్వాత అమన్ ఆటతీరుపైనా వారు కొన్ని వ్యాఖ్యలు చేశారు. ఇక కెప్టెన్సీ టాస్క్‌లో ముకేశ్‌కు జోడీగా అపూర్వ, ఝాన్సీకి జోడీగా మిథిలేష్ పోటీ పడ్డారు. ఉత్కంఠగా సాగిన ఈ పోటీలో ముకేశ్, అపూర్వ జోడీ విజయం సాధించింది. దీంతో ముకేశ్ బిగ్ బాస్ తెలుగు 10లో కొత్త కెప్టెన్‌గా ఎంపికయ్యాడు. అంతేకాకుండా అపూర్వకు కూడా ముకేశ్‌తో సమానంగా ఇమ్యూనిటీ లభించింది.
చివర్లో ఝాన్సీ స్వయంగా కెప్టెన్సీ బ్యాండ్‌ను ముకేశ్‌కు తొడిగి కొత్త కెప్టెన్‌గా ప్రకటించింది. మొత్తంగా ఒకే ఎపిసోడ్‌లో ఇద్దరు వైల్డ్ కార్డు కంటెస్టెంట్ల ఎంట్రీ, పాత కంటెస్టెంట్లకు షాక్, కెప్టెన్సీ కంటెండర్ల మార్పులు, చివరికి ముకేశ్ కెప్టెన్ కావడం వంటి పరిణామాలతో హౌస్‌లో గేమ్ మరింత ఆసక్తికరంగా మారింది.
