90 Hours Fasting | ముంబైకి చెందిన వ్యాపారవేత్త, సంస్థల ముఖ్య కార్యనిర్వహణాధికారి అభిషేక్‌ అగర్వాల్‌ తన పుట్టినరోజును వినూత్నంగా జరుపుకున్నారు. దాదాపు 90 గంటల పాటు ఆహారం తీసుకోకుండా ఉపవాసం చేశారు. ఆకలి, మానసిక సంకల్పశక్తి మధ్య పోరాటాన్ని పరీక్షించుకోవాలనే ఉద్దేశంతో ఈ ప్రయోగం చేసినట్లు సామాజిక మాధ్యమాల్లో వెల్లడించారు. మొదటి రోజు ఉపవాసం సులభంగానే అనిపించిందని, రెండో రోజు నుంచి కష్టంగా మారిందని తెలిపారు. మూడో రోజు మనసు ప్రశాంతంగా అనిపించిందని, నాలుగో రోజు తన పుట్టినరోజున గత కొన్ని నెలల్లో ఎన్నడూ లేనంత స్పష్టంగా ఆలోచించగలిగానని పేర్కొన్నారు. ఉపవాసం ముగిసిన తర్వాత మరింత బలంగా, శక్తివంతంగా ఉన్నట్లు అనిపించిందని, తన మానసిక పరిమితులను తానే అధిగమించిన అనుభూతి కలిగిందని చెప్పారు. అయితే ఆయన అనుభవం ఆధారంగా ఇంతసేపు ఉపవాసం ఉండడం అందరికీ సురక్షితమని లేదా ఆరోగ్యానికి మేలు చేస్తుందని నిర్ధారించలేమని నిపుణులు సూచిస్తున్నారు.
ఆహారం ఆపితే ఏం జ‌రుగుతుంది..
ఆహారం తీసుకోవడం ఆపినప్పుడు శరీరం మొదట రక్తంలో అందుబాటులో ఉన్న గ్లూకోజ్‌ను, కాలేయం, కండరాల్లో నిల్వ ఉన్న గ్లైకోజన్‌ను శక్తి కోసం ఉపయోగిస్తుంది. గంటలు గడిచేకొద్దీ ఈ నిల్వలు తగ్గిపోవడంతో శరీరం ప్రత్యామ్నాయ శక్తి వనరులపై ఆధారపడుతుంది. అప్పుడు నిల్వ ఉన్న కొవ్వును విచ్ఛిన్నం చేసి శక్తిగా వినియోగించడం పెరుగుతుంది. కాలేయం కొవ్వు నుంచి కీటోన్లు అనే పదార్థాలను ఉత్పత్తి చేస్తుంది. ఈ ప్రక్రియను కీటోసిస్‌ అంటారు. ఉపవాసం కొనసాగుతున్న కొద్దీ మెదడు సహా శరీరంలోని కొన్ని అవయవాలు కూడా కీటోన్లను ఎక్కువగా వినియోగించడం ప్రారంభిస్తాయి. కొందరికి ఈ దశలో ఆలోచనలు స్పష్టంగా ఉన్నట్లు అనిపిస్తాయి. అయితే ప్రతి ఒక్కరిలో శరీర స్పందన ఒకేలా ఉండదు. మానసికంగా చురుకుగా ఉన్నట్లు అనిపించడం మాత్రమే దీర్ఘకాల ఉపవాసం ఆరోగ్యానికి మేలు చేస్తుందనడానికి ఆధారం కాదు.
కండ‌రాల‌కు న‌ష్ట‌మా..
ఆహారం తీసుకోకపోవడం వల్ల ఇన్సులిన్‌ స్థాయిలు తగ్గుతాయి. నిల్వ ఉన్న శక్తిని వినియోగించేందుకు శరీరంలో ఇతర హార్మోన్లు పనిచేస్తాయి. అయితే దీర్ఘకాలం ఆహారం అందకపోతే శరీరం కొవ్వుతోపాటు కొంత ప్రోటీన్‌ను కూడా విచ్ఛిన్నం చేసి గ్లూకోజ్‌ తయారీకి అవసరమైన పదార్థాలను పొందుతుంది. దీనివల్ల కండరాల వంటి శరీరంలోని సన్నని కణజాలంపై ప్రభావం పడే అవకాశం ఉంటుంది. ఉపవాసం సమయంలో కొందరికి ఆకలి తగ్గినట్లు అనిపించినా, మరికొందరిలో అలసట, తలనొప్పి, చిరాకు, వికారం, మలబద్ధకం, ఏకాగ్రత లోపించడం, నిద్ర సమస్యలు కనిపిస్తాయి. నీరు తాగుతున్నప్పటికీ మూత్రం, చెమట, శ్వాస ద్వారా శరీరం ద్రవాలను కోల్పోతుంది. తగినంత ద్రవాలు అందకపోతే నిర్జలీకరణం ఏర్పడుతుంది. సోడియం, పొటాషియం వంటి ఎలక్ట్రోలైట్లలో అసమతుల్యత ఏర్పడితే కండరాలు, నరాలు, గుండె పనితీరుపై కూడా తీవ్ర ప్రభావం పడే ప్రమాదం ఉంటుంది.
అందరికీ అనుకూలమేనా..
90 గంటల పాటు ఉపవాసం ఉండడం బరువు తగ్గడానికి లేదా ఆరోగ్యాన్ని మెరుగుపరచుకోవడానికి అందరికీ అనుకూలమైన పద్ధతి కాదని నిపుణులు హెచ్చరిస్తున్నారు. ముఖ్యంగా మధుమేహం ఉన్నవారు, ఇతర దీర్ఘకాలిక ఆరోగ్య సమస్యలతో బాధపడేవారు, ఆహారపు అలవాట్లకు సంబంధించిన సమస్యల చరిత్ర ఉన్నవారు, గర్భిణులు, పాలిచ్చే తల్లులు ఇలాంటి ఉపవాసాలకు దూరంగా ఉండాలి లేదా వైద్యుల సలహా మేరకే నిర్ణయం తీసుకోవాలి. రక్తంలో చక్కెర స్థాయిలు లేదా రక్తపోటుపై ప్రభావం చూపే మందులు వాడుతున్నవారికి కూడా ప్రమాదాలు ఉంటాయి. ఉపవాసం వల్ల శరీరంలో జరిగే మార్పులు వ్యక్తి ఆరోగ్య పరిస్థితి, తీసుకునే ద్రవాలు, మందులు తదితర అంశాలపై ఆధారపడి ఉంటాయి. అందువల్ల దీర్ఘకాల ఉపవాసాన్ని స్వయంగా ప్రయోగించకుండా, ఆరోగ్య ప్రయోజనాల కోసం పాటించాలనుకుంటే ముందుగా వైద్య నిపుణులను సంప్రదించడం అవసరమ‌ని నిపుణులు సూచిస్తున్నారు.
