Jharkhand Accident: జార్ఖండ్ రాష్ట్రంలో వేకువజామున అత్యంత విషాదకర ఘటన చోటుచేసుకుంది. జంషెడ్‌పూర్ నగరంలోని సోనారీ పోలీస్ స్టేషన్ పరిధిలోని మెరైన్ డ్రైవ్ రోడ్డుపై వేగంగా వెళ్తున్న ఒక కారు, రోడ్డు పక్కన ఆగి ఉన్న భారీ ట్రక్కును వెనుక నుంచి బలంగా ఢీకొట్టింది. ఈ ఘోర రోడ్డు ప్రమాదంలో జార్ఖండ్ గ్రామీణాభివృద్ధి, పంచాయతీ రాజ్ శాఖ మంత్రి దీపికా పాండే సింగ్ కుమార్తెతో పాటు కారులో ప్రయాణిస్తున్న మరో ముగ్గురు అక్కడికక్కడే ప్రాణాలు కోల్పోయారు. ప్రమాద తీవ్రతకు కారు ముందు భాగం పూర్తిగా నుజ్జునుజ్జయింది. సమాచారం అందుకున్న పోలీసులు వెంటనే ఘటనా స్థలానికి చేరుకుని సహాయక చర్యలు చేపట్టి, మృతదేహాలను వెలికితీసి పోస్టుమార్టం నిమిత్తం ఆసుపత్రికి తరలించారు.
సీఎం హేమంత్ సోరెన్ తీవ్ర దిగ్భ్రాంతి – ప్రగాఢ సానుభూతి:
ఈ హృదయ విదారక ఘటనపై జార్ఖండ్(Jharkhand Accident) ముఖ్యమంత్రి హేమంత్ సోరెన్ తీవ్ర దిగ్భ్రాంతి వ్యక్తం చేశారు. కన్నబిడ్డను కోల్పోవడం ఏ తల్లిదండ్రులకైనా తీరని లోటని, సోదరి సమానురాలైన మంత్రి దీపికా పాండే కుటుంబానికి ఇది కోలుకోలేని దెబ్బ అని సోషల్ మీడియా వేదికగా ఆవేదన చెందారు. మృతుల ఆత్మలకు శాంతి చేకూరాలని ప్రార్థిస్తూ, వారి కుటుంబ సభ్యులకు ప్రగాఢ సానుభూతి తెలిపారు. కాగా, ఈ ప్రమాదంపై పోలీసులు కేసు నమోదు చేసి వేగం వల్లే ఈ ఘోరం జరిగిందా అనే కోణంలో దర్యాప్తు చేస్తున్నారు.
