సుల్తానాబాద్, వెలుగు: పెద్దపల్లి జిల్లా గోదావరిఖనిలో ఇటీవల హత్యకు గురైన ఇంజనీరింగ్ విద్యార్థిని టి.అక్షితారాణి (20) కేసును రాష్ట్ర ప్రభుత్వం తీవ్రంగా పరిగణిస్తోందని మంత్రి అడ్లూరి లక్ష్మణ్ కుమార్ అన్నారు. పెద్దపల్లి జిల్లా సుల్తానాబాద్ మండలం రేగడి మద్దికుంటలోని అక్షితారాణి కుటుంబసభ్యులను ఎమ్మెల్యే విజయ రమణారావు, రాజ్ఠాకూర్తో కలిసి మంత్రి గురువారం పరమర్శించారు. దళిత విద్యార్థిని అక్షితారాణికి బలవంతంగా పురుగుల మందు తాగించి పాశవికంగా హత్య చేయడం దారుణమన్నారు.
నిందితులను 24 గంటల్లోపు పోలీసులు అరెస్ట్ చేశారని, వారికి కఠినంగా శిక్ష పడేలా ప్రభుత్వం చర్యలు తీసుకుంటోందని తెలిపారు. బాధిత కుటుంబానికి అన్ని విధాలా అండగా ఉంటామన్నారు. ఈ సందర్భంగా రూ.4.12 లక్షల పరిహారం అందించారు. కుటుంబానికి ఇందిరమ్మ ఇల్లు, కుటుంబ సభ్యుల్లో ఒకరికి ఔట్సోర్సింగ్ ఉద్యోగం ఇప్పిస్తామని విప్ విజయ రమణారావు హామీ ఇచ్చారు. మాజీ మంత్రి మోత్కుపల్లి నరసింహులు, జిల్లా లైబ్రరీ సంస్థ చైర్మన్ అన్నయ్య గౌడ్, మార్కెట్ చైర్మన్ ప్రకాశ్ రావు, రామగుండం సీపీ, జిల్లా ఉన్నతాధికారులు, కాంగ్రెస్ నాయకులు పాల్గొన్నారు. సుల్తానాబాద్ లో జర్నలిస్ట్ టీకే రమేశ్ మరణించగా, ఆయన కుటుంబాన్ని మంత్రి, ఎమ్మెల్యేలు పరామర్శించారు.
