Nani The Paradise Day 1 Collections: ‘దసరా’ సినిమా తర్వాత న్యాచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో వచ్చిన మరో మాస్ మూవీ ‘ది ప్యారడైజ్’. యాక్షన్ డ్రామాగా తెరకెక్కిన ఈ సినిమా విడుదలకు ముందే భారీ అంచనాలను క్రియేట్ చేసింది. సినిమాకు సంబంధించిన అప్‌డేట్స్‌తో పాటు ‘ఆయా షేర్’, ‘ఏష నాగుల’ వంటి సాంగ్స్ కూడా సినిమాపై హైప్‌ను మరింత పెంచాయి. భారీ అంచనాల మధ్య ప్రేక్షకుల ముందుకు వచ్చిన ప్యారడైజ్ తొలి రోజే బాక్సాఫీస్ వద్ద సత్తా చాటింది.
ప్రపంచవ్యాప్తంగా ప్రీమియర్స్‌తో పాటు మొదటి రోజు కలెక్షన్లు కలిపి రూ.88 కోట్లకు పైగా గ్రాస్ వసూలు చేసినట్లు చిత్ర యూనిట్ అధికారికంగా ప్రకటించింది. దీంతో నాని కెరీర్‌లోనే ఇది ఆల్‌టైమ్ హయ్యెస్ట్ డే 1 ఓపెనింగ్‌గా నిలిచింది. తెలుగు రాష్ట్రాలతో పాటు ఓవర్సీస్, ఇతర భాషల మార్కెట్లలోనూ ప్యారడైజ్ మూవీకి మొదటిరోజు మంచి స్పందన దక్కింది. ముఖ్యంగా తెలంగాణ, ఆంధ్రప్రదేశ్‌లోని ప్రధాన కేంద్రాల్లో మార్నింగ్ షోల నుంచే థియేటర్లు ప్రేక్షకులతో సందడిగా మారాయి. పలు ప్రాంతాల్లో హౌస్‌ఫుల్ బోర్డులు కనిపించాయి.
ముఖ్యంగా నైజాం ఏరియాలో ది ప్యారడైజ్ హవా స్పష్టంగా కనిపించింది. తెలుగుతో పాటు హిందీ, తమిళ మార్కెట్లలోనూ సినిమా మంచి వసూళ్లు సాధించినట్లు ట్రేడ్ వర్గాలు చెబుతున్నాయి. అయితే సినిమా టాక్ మాత్రం కాస్త డివైడ్‌గా ఉంది. అయినప్పటికీ సినిమాకు ఉన్న భారీ హైప్, వీకెండ్‌కు చేరుకోవడం, అడ్వాన్స్ బుకింగ్స్‌కు మంచి స్పందన రావడం వంటి అంశాలు కలెక్షన్లకు కలిసొచ్చే అవకాశాలు కనిపిస్తున్నాయి. ముఖ్యంగా తొలి రోజు భారీ ఓపెనింగ్ సాధించిన నేపథ్యంలో రాబోయే రోజుల్లో వసూళ్లు మరింత పెరిగే అవకాశం ఉంది. మొత్తంగా ప్యారడైజ్ నాని కెరీర్‌లోనే భారీ ఓపెనింగ్ సాధించిన సినిమాగా రికార్డు సృష్టించింది. నాని కెరీర్‌లో ఈ సినిమా కొత్త బాక్సాఫీస్ బెంచ్‌మార్క్‌ను సెట్ చేస్తుందా? అనేది చూడాలి.
