బులియన్ మార్కెట్లో గోల్డ్, సిల్వర్ రేట్ల మధ్య జరుగుతున్న పరిణామాలు ప్రస్తుతం ట్రేడర్లను, ఇన్వెస్టర్లను ఆందోళనకు గురిచేస్తున్నాయి. గత కొన్ని నెలలుగా ఈ రెండు విలువైన లోహాలూ తీవ్ర ఒత్తిడిని ఎదుర్కొంటున్నప్పటికీ.. బంగారం పతనంతో పోలిస్తే వెండి ధరల క్రాష్ ఊహించని విధంగా ఉంది.
ఈ ఏడాది అంతర్జాతీయ మార్కెట్లలో బంగారం కేవలం 3% మాత్రమే నష్టపోగా.. వెండి మాత్రం ఏకంగా 16 శాతానికి పైగా పడిపోయింది. అంతేకాకుండా ఈ ఏడాది జనవరిలో నమోదైన ఆల్ టైమ్ హై ధర 121 డాలర్లతో పోలిస్తే ప్రస్తుతం వెండి రేటు ఏకంగా 50% పడిపోవటం సంచలనంగా మారింది. స్వల్పకాలికంగా భారీ నష్టాలను చవిచూస్తున్న వెండి.. దీర్ఘకాలికంగా మాత్రం మంచి లాభాలను అందించి హిస్టరీ క్రియేట్ చేసింది. అయినప్పటికీ బంగారం కంటే ఎక్కువ నష్టపోవడానికి అనేక కారణాలు ఉన్నాయని నిపుణులు అంటున్నారు.
వెండి ధరలు ఈ స్థాయిలో పతనమవడానికి ప్రధాన కారణం దాని 'ద్వంద్వ స్వభావం'. వెండి కేవలం ఒక విలువైన లోహం మాత్రమే కాదు.. అంతకంటే ఎక్కువగా పారిశ్రామిక వస్తువు. ప్రపంచవ్యాప్తంగా వెండి డిమాండ్‌లో 50 శాతానికి పైగా భాగం ఎలక్ట్రానిక్స్, ఎలక్ట్రిక్ వాహనాలు, సోలార్ ప్యానెల్స్ వంటి పారిశ్రామిక అవసరాల నుంచే వస్తుంది. ప్రస్తుత ఆర్థిక సంవత్సరంలో వడ్డీ రేట్లు పెరగడం, ద్రవ్యోల్బణం, భౌగోళిక రాజకీయ ఉద్రిక్తతల కారణంగా తయారీ రంగాలపై తీవ్ర ప్రభావం పడుతోంది. ముఖ్యంగా సోలార్ ప్యానెల్ తయారీదారులు వెండి వాడకాన్ని తగ్గించడం, ఈ ఏడాది పారిశ్రామిక వినియోగం సుమారు 3% వరకు పడిపోనుందనే అంచనాలు వెండి ధరలపై తీవ్ర ప్రతికూల ప్రభావాన్ని చూపుతున్నాయి. దీనికి తోడు సెంటిమెంట్ మారడంతో ఊహాగానాలు చేసే ట్రేడర్లు భారీగా అమ్మకాలకు పాల్పడటం, సీఎంఈ మార్జిన్ పెంపుదల వంటి అంశాలు వెండి రేట్లను కుంగదీశాయి.
బంగారానికి ఉన్న బలమైన మద్దతు వెండికి లేకపోవడం మరో ప్రధాన కారణం. ప్రపంచవ్యాప్తంగా ఉన్న సెంట్రల్ బ్యాంకులు తమ విదేశీ మారకద్రవ్య నిల్వలుగా బంగారాన్ని భారీగా కొనుగోలు చేస్తుండటం వల్ల, మార్కెట్లో ధరలు పడిపోకుండా ఒక స్థిరమైన మద్దతు లభిస్తోంది. గత 3ఏళ్లుగా సెంట్రల్ బ్యాంకులు ఏటా సగటున 1,000 టన్నులకు పైగా బంగారాన్ని కొనుగోలు చేస్తూనే ఉన్నాయి. కానీ వెండికి సెంట్రల్ బ్యాంకుల నుంచి డిమాండ్ పెద్దగా ఉండదు. అంతేకాకుండా బంగారం మార్కెట్‌తో పోలిస్తే వెండి మార్కెట్ పరిమాణం చాలా చిన్నది. వెండి వారాంతపు టర్నోవర్ కేవలం బంగారం టర్నోవర్‌లో 15% మాత్రమే ఉంటుంది. ఇంత చిన్న మార్కెట్ కావడంతో చిన్న చిన్న అమ్మకాల ఆర్డర్లు కూడా రేట్లను భారీగా ప్రభావితం చేస్తున్నాయి.
వెండిని పీడిస్తున్న ఈ ప్రతికూలతలే భవిష్యత్తులో సానుకూల ప్రభావాలుగా మారే అవకాశం లేకపోలేదని నిపుణులు అంటున్నారు. పారిశ్రామిక డిమాండ్ మళ్లీ పుంజుకోవడం, స్థూల ఆర్థిక పరిస్థితుల్లో మార్పులు రావడం జరిగితే.. వెండి ధరలు మళ్లీ ఊహించని విధంగా భారీ ర్యాలీ చేసే అవకాశం ఉందనేది వారి అంచనా.
