ప్రభుత్వ హాస్టళ్ల మెనూలో బీఫ్‌ను చేర్చే అంశం చర్చనీయాంశంగా మారింది. కొంతమంది విద్యార్థులు మెనూలో బీఫ్‌ను కూడా చేర్చాలని కోరినట్లు తమిళనాడు రాష్ట్ర సాంఘిక న్యాయ శాఖ మంత్రి వన్ని అరసు తెలిపారు. అయితే హాస్టల్ విద్యార్థుల మధ్య ఈ అంశంపై భిన్నాభిప్రాయాలు ఉన్నందున.. సంబంధిత అధికారులతో చర్చించిన తర్వాతే తుది నిర్ణయం తీసుకుంటామని ఆయన స్పష్టం చేశారు.
సైదాపేటలోని ఎంసీ రాజా సోషల్ జస్టిస్ హాస్టల్‌ను మంత్రి ఇటీవల సందర్శించి అక్కడి సౌకర్యాలు, విద్యార్థులకు అందుతున్న ఆహారాన్ని సమీక్షించారు. ఈ సందర్భంగా మాట్లాడుతూ.. విద్యార్థుల అభిప్రాయాల ఆధారంగా హాస్టల్ మెనూలో మార్పులు చేస్తున్నట్లు చెప్పారు. ఇప్పటికే మెనూలో పలు మార్పులు చేశామని, మాంసాహార వంటకాలతో పాటు వారానికి ఒకసారి బిర్యానీని కూడా అందిస్తున్నట్లు తెలిపారు.
ప్రస్తుతం ప్రభుత్వ హాస్టళ్లలో మటన్, చికెన్‌ వంటి మాంసాహార వంటకాలు అందిస్తున్నామని మంత్రి చెప్పారు. అయితే గ్రామీణ ప్రాంతాల నుంచి వచ్చే కొంతమంది విద్యార్థులు మటన్ ధర ఎక్కువగా ఉండటంతో తాము తినడం లేదని, దానికి ప్రత్యామ్నాయంగా బీఫ్‌ను మెనూలో చేర్చాలని కోరినట్లు వివరించారు. విద్యార్థులందరి అభిప్రాయాలను పరిగణనలోకి తీసుకున్న తర్వాతే నిర్ణయం ఉంటుందని తెలిపారు. ఆహార మెనూలో ఇతర మార్పులు కూడా చేసినట్లు మంత్రి వెల్లడించారు. ఉప్మా, సేమియా కిచడీ వంటి కొన్ని అల్పాహార పదార్థాలను తొలగించి వాటి స్థానంలో ఇడ్లీ, దోస వంటి వంటకాలను చేర్చినట్లు చెప్పారు.
మరోవైపు హాస్టల్ మెనూలో బీఫ్‌ను చేర్చే ప్రతిపాదనపై పుతియ తమిళగం పార్టీ వ్యవస్థాపకుడు, అధ్యక్షుడు డాక్టర్ కె. కృష్ణస్వామి అభ్యంతరం వ్యక్తం చేశారు. ఈ ప్రతిపాదనను వ్యతిరేకిస్తూ, ప్రభుత్వం దీనిని ఉపసంహరించుకోవాలని డిమాండ్ చేశారు. హాస్టల్ విద్యార్థులకు సమతుల్యమైన పోషకాహారం అందించాల్సిన అవసరం ఉందని ఆయన పేర్కొన్నారు. ప్రస్తుతం ఇది విద్యార్థుల నుంచి వచ్చిన అభ్యర్థన మాత్రమేనని, తుది నిర్ణయం ఇంకా తీసుకోలేదని మంత్రి వన్ని అరసు ప్రకటన స్పష్టం చేస్తోంది.
మరిన్ని జాతీయ వార్తల కోసం ఇక్కడ క్లిక్ చేయండి..
