Junior Civil Judge Courts: రాష్ట్రంలో న్యాయ వ్యవస్థను మరింత పటిష్టం చేసే దిశగా తెలంగాణ సర్కార్ కీలక అడుగు వేసింది. పెండింగ్ కేసుల భారాన్ని తగ్గించి, సామాన్య ప్రజలకు మరింత వేగంగా సత్వర న్యాయం అందించాలనే ఉద్దేశంతో తొలి విడతలో 200 కొత్త అదనపు జూనియర్ సివిల్ జడ్జి కోర్టుల ఏర్పాటుకు గ్రీన్ సిగ్నల్ ఇచ్చింది. ఈ మేరకు న్యాయ వ్యవహారాల కార్యదర్శి బి. పాపిరెడ్డి జీవో ఎంఎస్ నెం.59 ని జారీ చేశారు.
హైకోర్టు ప్రతిపాదనలకు ఆమోదం: జీవో జారీ
రాష్ట్రవ్యాప్తంగా మొత్తం 594 కొత్త కోర్టులను ఏర్పాటు చేయాలని తెలంగాణ హైకోర్టు గతంలో ప్రభుత్వానికి ప్రత్యేక ప్రతిపాదనలు పంపింది. ఈ ప్రతిపాదనలను నిశితంగా పరిశీలించిన రాష్ట్ర ప్రభుత్వం, ఆర్థిక శాఖ అనుమతితో తొలి దశ కింద 200 కోర్టులను మంజూరు చేసింది. కక్షిదారులకు కోర్టు సేవలను మరింత చేరువ చేయడం, ప్రస్తుతం ఉన్న న్యాయమూర్తులపై రోజురోజుకూ పెరుగుతున్న పని భారాన్ని తగ్గించడమే ఈ నిర్ణయ ప్రధాన ఉద్దేశమని ప్రభుత్వం తన ఉత్తర్వుల్లో స్పష్టం చేసింది.
Read also: Hyderabad Crime: ఉద్యోగినికి మత్తుమందు ఇచ్చి లైంగికదాడి
Junior Civil Judge Courts: అత్యధికంగా హైదరాబాద్ మెట్రోపాలిటన్ పరిధిలోనే కోర్టులు
కొత్తగా మంజూరైన 200 కోర్టులలో అత్యధిక భాగం హైదరాబాద్ మెట్రోపాలిటన్ ప్రాంతానికే కేటాయించారు. మెట్రో పరిధిలో మొత్తం 71 కోర్టులు ఏర్పాటు కానుండగా.. ఇందులో రంగారెడ్డి జిల్లాకు 30, మేడ్చల్-మల్కాజిగిరి జిల్లాకు 25, హైదరాబాద్ జిల్లాకు 16 చొప్పున కేటాయించారు. అలాగే ఇతర జిల్లాల విషయానికి వస్తే నల్గొండకు 10, సంగారెడ్డి మరియు ఖమ్మం జిల్లాలకు చెరో 8 కోర్టులు చొప్పున దక్కాయి.
పెండింగ్ కేసుల పరిష్కారానికి మార్గం సుగమం
రాష్ట్రంలోని జిల్లా కోర్టులలో పెండింగ్ కేసుల సంఖ్య భారీగా పెరుగుతున్న తరుణంలో ఈ నిర్ణయం ఎంతో ఊరటనివ్వనుంది. ఈ కొత్త కోర్టుల ఏర్పాటు ద్వారా భవిష్యత్తులో కేసుల విచారణ ప్రక్రియ వేగవంతం అవుతుందని అధికారులు ధీమా వ్యక్తం చేస్తున్నారు. అయితే ప్రస్తుతం ఇది కేవలం కోర్టుల మంజూరుకు సంబంధించిన ఉత్తర్వు మాత్రమే కాగా.. భవిష్యత్తులో సిబ్బంది నియామకం, అవసరమైన మౌలిక వసతుల కల్పన పూర్తయిన తర్వాతే ఇవి పూర్తిస్థాయిలో సేవలు అందించనున్నాయి.
Read Also hindi news: hindi.vaartha.com
Epaper: epaper.vaartha.com
Read Also:
