The Paradise | నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కిన ‘ది ప్యారడైజ్’ ఎట్టకేలకు ప్రేక్షకుల ముందుకు వచ్చింది. ‘దసరా’ తర్వాత వీరిద్దరి కలయికలో వచ్చిన ఈ సినిమా సెప్టెంబర్ 24న ప్రపంచవ్యాప్తంగా విడుదలైంది. కయాదు లోహర్ హీరోయిన్‌గా నటించిన ఈ చిత్రంలో నాని పూర్తిగా కొత్త తరహా పాత్రలో కనిపించారు. విడుదలకు ముందు భారీ అంచనాలు నెలకొన్న ఈ సినిమాకు తొలి రోజు మిశ్రమ స్పందనలు వచ్చినప్పటికీ.. బాక్సాఫీస్ దగ్గర మాత్రం ఓపెనింగ్ వసూళ్లు గట్టిగానే నమోదైనట్లు ట్రేడ్ వర్గాల గణాంకాలు చెబుతున్నాయి.సెప్టెంబర్ 23న నిర్వహించిన ప్రత్యేక ప్రీమియర్ షోలతో పాటు సెప్టెంబర్ 24న జరిగిన రెగ్యులర్ షోల కలెక్షన్లను కలిపి చూస్తే ‘ది ప్యారడైజ్’ నాని కెరీర్‌లోనే అత్యధిక తొలి రోజు వసూళ్లు సాధించిన సినిమాగా నిలిచినట్లు సమాచారం.
ముఖ్యంగా ఏ సర్టిఫికేట్ ఉన్నప్పటికీ ప్రేక్షకుల నుంచి వచ్చిన స్పందన, భారీ స్థాయిలో జరిగిన అడ్వాన్స్ బుకింగ్స్ సినిమాకు మంచి ప్రారంభాన్ని అందించాయి.ట్రేడ్ వర్గాల నివేదికల ప్రకారం.. తొలి రోజు భారతీయ బాక్సాఫీస్ వద్ద ‘ది ప్యారడైజ్’ సుమారు రూ.34.51 కోట్ల నెట్ వసూళ్లు సాధించినట్లు తెలుస్తోంది. దేశవ్యాప్తంగా దాదాపు 9,574 షోలు ప్రదర్శించగా, సగటు ఆక్యుపెన్సీ 47 శాతానికి పైగా నమోదైనట్లు గణాంకాలు సూచిస్తున్నాయి. తెలుగు రాష్ట్రాల్లో సినిమా వసూళ్లు ప్రధానంగా ఉండగా, హిందీ మార్కెట్‌లోనూ చెప్పుకోదగ్గ స్పందన వచ్చినట్లు సమాచారం. మరోవైపు కొన్ని ప్రాంతాల్లో ఉదయం షోలతో పోలిస్తే రోజంతా ఆక్యుపెన్సీలో మార్పులు కనిపించినప్పటికీ.. మొత్తంగా సినిమాకు మంచి స్థాయిలో ప్రేక్షకులు వచ్చినట్లు ట్రేడ్ గణాంకాలు వెల్లడిస్తున్నాయి. ముఖ్యంగా నాని మార్కెట్‌తో పాటు ‘దసరా’ దర్శకుడు శ్రీకాంత్ ఓదెలపై ఉన్న అంచనాలు కూడా తొలి రోజు వసూళ్లకు కారణంగా నిలిచినట్లు పరిశ్రమ వర్గాలు భావిస్తున్నాయి.
ఇక నాని గత చిత్రాల తొలి రోజు వసూళ్లతో పోల్చితే ‘ది ప్యారడైజ్’ గణనీయమైన ఆధిక్యాన్ని సాధించినట్లు తెలుస్తోంది. 2025లో విడుదలైన ‘హిట్: ది థర్డ్ కేస్’ సుమారు రూ.21 కోట్ల నెట్‌తో ప్రారంభమైంది. శ్రీకాంత్ ఓదెల తొలి చిత్రం ‘దసరా’ రూ.23.20 కోట్ల తొలి రోజు నెట్ వసూళ్లు సాధించింది. ‘సరిపోదా శనివారం’ సుమారు రూ.9 కోట్లు, ‘హాయ్ నాన్న’ సుమారు రూ.4.90 కోట్ల తొలి రోజు నెట్ వసూళ్లు సాధించినట్లు ట్రేడ్ గణాంకాలు ఉన్నాయి.ఈ లెక్కలతో పోలిస్తే ‘ది ప్యారడైజ్’ తొలి రోజు రూ.34.51 కోట్ల నెట్ వసూళ్లతో నాని కెరీర్‌లోనే కొత్త బెంచ్‌మార్క్ సెట్ చేసినట్లు తెలుస్తోంది. అదే సమయంలో ఈ సినిమాకు ఏ సర్టిఫికేట్ ఉండటం కూడా తొలి రోజు వసూళ్లపై పెద్దగా ప్రభావం చూపలేదని ఈ గణాంకాలు సూచిస్తున్నాయి. అడ్వాన్స్ బుకింగ్స్, ప్రీమియర్ షోలు, తొలి రోజు రెగ్యులర్ షోల వసూళ్లను కలిపి చూస్తే ప్రపంచవ్యాప్తంగా ‘ది ప్యారడైజ్’ తొలి దశలో సుమారు రూ.55 కోట్ల నుంచి రూ.60 కోట్ల గ్రాస్ వసూళ్లు సాధించినట్లు కొన్ని బాక్సాఫీస్ గణాంకాలు పేర్కొంటున్నాయి.
