ఏపీ స్థానిక సంస్థల ఎన్నికల షెడ్యూల్ ముంగిట విజయవాడ రాజకీయాలు ఒక్కసారిగా హీటెక్కాయి. గత కొంతకాలంగా స్తబ్దుగా ఉన్న వంగవీటి కుటుంబం ఇప్పుడు సంచలన నిర్ణయానికి సిద్ధమైంది. బెజవాడ రాజకీయాల్లో కీలక నేత అయిన వంగవీటి రాధాకృష్ణ జనసేన పార్టీలో చేరడం దాదాపు ఖరారైంది. నేడు జనసేన అధినేత, డిప్యూటీ సీఎం పవన్ కల్యాణ్ సమక్షంలో ఆయన పార్టీ కండువా కప్పుకోనున్నారు. ఇటీవల ముఖ్యమంత్రి చంద్రబాబు నాయుడు, జనసేనాని పవన్ కల్యాణ్‌లను వంగవీటి రాధా వరుసగా కలవడంతోనే ఈ చేరికపై స్పష్టత వచ్చింది.
వంగవీటి రాధాకృష్ణ జనసేనలో చేరడం వెనుక ఒక పెద్ద రాజకీయ వ్యూహం ఉన్నట్లు తెలుస్తోంది. ప్రస్తుతం స్థానిక ఎన్నికల పొత్తుల చర్చల్లో విజయవాడ మేయర్ స్థానాన్ని జనసేన దక్కించుకునేలా కసరత్తు సాగుతోంది. ఈ క్రమంలోనే విజయవాడ మేయర్ పీఠంపై వంగవీటి కుటుంబం కన్నేసింది. గత కొంతకాలంగా విజయవాడ మేయర్ రేసులో వంగవీటి రాధాకృష్ణతో పాటు ఆయన సతీమణి వంగవీటి పుష్పవల్లి పేర్లు బలంగా వినిపిస్తున్నాయి. తాజా రిజర్వేషన్ల లెక్కలను బట్టి వంగవీటి కుటుంబం నుంచే మేయర్ అభ్యర్థి బరిలో ఉంటారనే ప్రచారం బెజవాడ పొలిటికల్ సర్కిల్స్‌లో జోరందుకుంది.
వంగవీటి రాధాకృష్ణ కేవలం ఒంటరిగా కాకుండా తన భారీ అనుచరగణంతో జనసేన వైపు అడుగులు వేస్తున్నారు. ముఖ్యంగా విజయవాడ సెంట్రల్ నియోజకవర్గంలో వంగవీటి రాధాకు బలమైన పట్టు ఉంది. ఇక్కడ మెజారిటీ డివిజన్లలో రాధా ముఖ్య అనుచరులు, తాజా మాజీ కార్పొరేటర్లు ఉన్నారు. ఇప్పుడు వంగవీటి రాధా జనసేన బాట పట్టడంతో, ఆయన వెంటే విజయవాడ సెంట్రల్ పరిధిలోని తాజా మాజీ కార్పొరేటర్లు, కీలక నేతలు కూడా పెద్ద సంఖ్యలో జనసేనలో చేరేందుకు సిద్ధమవుతున్నారు. ఒకేసారి వంగవీటి క్యాడర్ మొత్తం జనసేనలోకి మారనుండటంతో బెజవాడ రాజకీయాలు ఆసక్తికరంగా మారాయి.
The post సెంట్రల్ లో టీడీపీకి వంగవీటి రాధ షాక్..? appeared first on Telugu Rajyam.
