ఆంధ్రప్రదేశ్‌లో రానున్న స్థానిక సంస్థల ఎన్నికల వేళ విజయనగరం జిల్లా నెల్లిమర్ల నియోజకవర్గంలో కూటమి పార్టీల మధ్య నెలకొన్న ఆధిపత్య పోరు ఒక్కసారిగా తారాస్థాయికి చేరింది. ఇక్కడి జనసేన ఎమ్మెల్యే లోకం మాధవి వైఖరి పట్ల తెలుగుదేశం పార్టీ శ్రేణులు తీవ్ర ఆగ్రహంతో ఊగిపోతున్నాయి. గత సార్వత్రిక ఎన్నికల్లో పొత్తులో భాగంగా నెల్లిమర్ల స్థానం జనసేనకు కేటాయించగా, కూటమి తరఫున లోకం మాధవి విజయం సాధించారు. అయితే, ఎన్నికల సమయం నుంచి ఇప్పటివరకు నియోజకవర్గంలో టీడీపీ శ్రేణులకు, జనసేన ఎమ్మెల్యేకు మధ్య కనీస సయోధ్య కుదరకపోవడం గమనార్హం.
తమ పార్టీ నేతలను, శ్రేణులను ఎమ్మెల్యే టార్గెట్ చేస్తున్నారని, ప్రభుత్వ కార్యక్రమాలు, అభివృద్ధి పనుల్లో టీడీపీని పూర్తిగా విస్మరిస్తున్నారంటూ తెలుగు తమ్ముళ్లు తీవ్ర ఆవేదన వ్యక్తం చేస్తున్నారు. ఎమ్మెల్యే లోకం మాధవి ఏకపక్ష ధోరణిపై ఇప్పటికే పార్టీ అధిష్ఠానానికి పలుమార్లు ఫిర్యాదులు వెళ్లినప్పటికీ క్షేత్రస్థాయిలో పరిస్థితుల్లో ఎలాంటి మార్పు రాలేదు. ఈ నేపథ్యంలో ఎమ్మెల్యే తీరును ఇకపై సహించేది లేదని కరాఖండిగా చెబుతున్న నెల్లిమర్ల టీడీపీ కేడర్.. రాబోయే స్థానిక సంస్థల ఎన్నికలపై ప్రత్యేక దృష్టి పెట్టింది.
రాష్ట్రస్థాయిలో కూటమి పొత్తులు ఎలా ఉన్నప్పటికీ.. నియోజకవర్గంలో మాత్రం పొత్తుల ధర్మాన్ని పక్కనబెట్టి అన్ని స్థానాల్లోనూ ఒంటరిగా బరిలోకి దిగాలని స్థానిక కేడర్ సంచలన నిర్ణయం తీసుకుంది. అన్ని స్థానాల్లోనూ పోటీ చేసి తమ సత్తా చాటాలని టీడీపీ శ్రేణులు భావిస్తున్నాయి. స్థానిక సంస్థల సమరంలో భాగంగా పార్టీ అధిష్ఠానం నుంచి అధికారికంగా బీ-ఫామ్ దొరికిన చోట అధికారిక టీడీపీ అభ్యర్థులు బరిలో ఉంటారని, ఒకవేళ పొత్తుల కారణంగా అధికారికంగా అవకాశం లేని చోట్ల స్వతంత్ర అభ్యర్థులుగా బరిలోకి దిగి తీరాలని స్థానిక నాయకులు అంతర్గత నిర్ణయానికి వచ్చినట్లు నియోజకవర్గంలో ముమ్మరంగా ప్రచారం జరుగుతోంది. కూటమి ధర్మం వర్తిస్తుందా లేదా అనేది పక్కనబెడితే.. నెల్లిమర్లలో స్థానిక సంస్థల సమరం మున్ముందు ఎలాంటి తీవ్ర రాజకీయ పరిణామాలకు దారితీస్తుందోనని ఉమ్మడి విజయనగరం జిల్లా రాజకీయ వర్గాల్లో ఇప్పుడు తీవ్ర చర్చ నడుస్తోంది.
The post నెల్లిమర్ల మేడంపై తెలుగు తమ్ముళ్ల ఆగ్రహం..! appeared first on Telugu Rajyam.
