‘రణబాలి’ సినిమా ప్రమోషన్లలో భాగంగా హీరో విజయ్ దేవరకొండ బ్రిటిష్ పాలన, ఆనాటి దారుణ పరిస్థితులపై తీవ్ర వ్యాఖ్యలు చేశారు. 1800ల కాలం నాటి చారిత్రక నేపథ్యంలో సాగే ఈ చిత్రం కోసం చేసిన పరిశోధనలో ఎన్నో దిగ్భ్రాంతికర నిజాలు తెలిశాయని ఆయన పేర్కొన్నారు.
“బ్రిటిషర్లు మనకు రైల్వేలను బహుమతిగా ఇచ్చారని చాలామంది అనుకుంటారు. కానీ అది నిజం కాదు. మన దేశంలోని పత్తి, ధాన్యం, ఖనిజాలు, సుగంధ ద్రవ్యాలు వంటి సంపదను వేగంగా మద్రాస్, బొంబాయి వంటి ఓడరేవులకు చేరవేసి, అక్కడి నుంచి వారి దేశానికి తరలించడానికే వారు రైల్వే ట్రాక్‌లను వేశారు” అని విజయ్ వివరించారు.
అంతేకాకుండా, 1876 నాటి మహా కరువు సమయంలో మద్రాస్ ప్రెసిడెన్సీ పరిధిలోనే దాదాపు 80 లక్షల మంది ఆకలితో అలమటించి చనిపోయారని ఆయన గుర్తుచేశారు. ఆ విపత్కర పరిస్థితుల్లో కూడా బ్రిటిషర్లు పన్నులను 50 నుంచి 60 శాతానికి పెంచి ప్రజలను తీవ్రంగా పీడించారని మండిపడ్డారు. బ్రిటిష్ వారు రాసుకున్న చరిత్ర కాకుండా, మన నిజమైన చరిత్రను నేటి తరం తెలుసుకోవాల్సిన అవసరం ఎంతైనా ఉందని విజయ్ స్పష్టం చేశారు.
