ఆర్మూర్ : నిజామాబాద్‌ జిల్లా ఆర్మూర్ పట్టణంలోని 10వ వార్డు ప్రజలు డ్రైనేజీ సమస్యతో తీవ్ర ఇబ్బందులు ఎదుర్కొంటున్నారు. డ్రైనేజీ వ్యవస్థ పూర్తిగా అస్తవ్యస్తంగా మారడంతో మురుగు నీరు రోడ్లపైకి వచ్చి దుర్గంధంతో నిండిపోతోంది. దోమల బెడద పెరిగి అంటు వ్యాధులు ప్రబలే ప్రమాదం ఉందని స్థానికులు ఆవేదన వ్యక్తం చేస్తున్నారు. రోడ్డు, డ్రైనేజీ పనులు చేపట్టేందుకు మున్సిపల్ శాఖ అధికారులు ముందుకు వస్తున్నప్పటికీ, ఆర్‌ అండ్ బీ శాఖ అధికారులు అనుమతులు ఇవ్వకుండా అడ్డుపడుతున్నారని వార్డు ప్రజలు ఆరోపిస్తున్నారు.
మున్సిపల్ అధికారులు స్పందించి రోడ్డు వేయడానికి సిద్ధంగా ఉన్నా ఆర్‌ అండ్ బీ అధికారులు మాత్రం పట్టించుకోవడం లేదని, కనీసం స్పందించడం కూడా లేదని ప్రజలు మండిపడుతున్నారు. అధికారుల మధ్య సమన్వయ లోపం కారణంగా సామాన్య ప్రజలు నరకం అనుభవిస్తున్నారని వాపోతున్నారు.
ఇప్పటికైనా ఉన్నతాధికారులు జోక్యం చేసుకుని ఆర్‌ అండ్ బీ శాఖ అధికారులపై చర్యలు తీసుకొని, 10వ వార్డులో తక్షణమే డ్రైనేజీ, రోడ్డు పనులు పూర్తి చేయాలని వార్డు ప్రజలు డిమాండ్ చేస్తున్నారు.
