ఆంధ్రప్రదేశ్‌లో గత కొన్ని నెలలుగా సంచలనం సృష్టిస్తున్న మద్యం కుంభకోణం, చిరుద్యోగుల జీతాల దోపిడీ వ్యవహారం చుట్టూ జరుగుతున్న ప్రచారంపై ఇప్పుడు రాజకీయ వర్గాల్లో సరికొత్త చర్చ మొదలైంది. ఒకవైపు తెలుగుదేశం పార్టీ సోషల్ మీడియా వేదికలు, కూటమి శ్రేణులు.. “ఆ నేత అరెస్ట్ ఖాయం.. ఈ నేత జైలుకు వెళ్లడం గ్యారెంటీ.. తాడేపల్లి ప్యాలెస్ గోడలు బద్దలు కొట్టడానికి ఈడీ సిద్ధమైంది” అంటూ రోజుకో సంచలన వార్తను వండి వారుస్తున్నాయి. అయితే, క్షేత్రస్థాయిలో జరుగుతున్న లీగల్ ప్రక్రియను పరిశీలిస్తే మాత్రం.. ఈ లిక్కర్ కేసు ఇప్పట్లో ఒక కొలిక్కి వచ్చేలా గానీ, పెద్ద తలకాయల అరెస్టులు జరిగేలా గానీ అవకాశాలు కనిపించడం లేదనే అభిప్రాయాలు వ్యక్తమవుతున్నాయి.
కూటమి ప్రభుత్వం అధికారంలోకి వచ్చిన తర్వాత మద్యం రవాణాలో రూ.195 కోట్ల అవినీతి, అలాగే మద్యం దుకాణాల సిబ్బంది జీతాల్లో రూ.400 కోట్ల అక్రమాలు జరిగాయంటూ సిట్ విచారణను ముమ్మరం చేసింది. ఈ వ్యవహారంలో ఎంపీ మిథున్ రెడ్డి, మాజీ ఎండీ వాసుదేవ రెడ్డిలపై తీవ్ర ఆరోపణలు వచ్చాయి. అయితే, కేంద్ర దర్యాప్తు సంస్థలైన ఈడీ లేదా ఐటీ అధికారికంగా రంగంలోకి దిగి పక్కాగా బినామీ అకౌంట్లను స్తంభింపజేయడం, కస్టడీలోకి తీసుకోవడం వంటి కీలక లీగల్ అడుగులు వేగంగా పడటం లేదు.
మరోవైపు నిందితులు కంప్యూటర్లు, హార్డ్ డిస్క్‌లు వంటి డిజిటల్ ఆధారాలను ముందే ధ్వంసం చేశారనే వార్తలు వస్తుండటంతో, లీగల్ గా కోర్టుల్లో నిలబడే పక్కా సాక్ష్యాలను సేకరించడం దర్యాప్తు సంస్థలకు ఒక పెద్ద సవాల్‌గా మారింది. కేవలం సోషల్ మీడియాలో హడావుడి చేయడం, రోజువారీ రాజకీయ విమర్శలకు ఈ స్కామ్‌లను వాడుకోవడం తప్ప.. నిజంగానే తప్పు చేసిన బడా బాబులను బోనులో నిలబెట్టే చట్టపరమైన చర్యలు నత్తనడకన సాగుతున్నాయనే విమర్శలు వస్తున్నాయి. గతంలో వివేకా హత్య కేసు లాంటి పెద్ద కేసుల దర్యాప్తులే ఏళ్ల తరబడి సాగుతున్న తరుణంలో, ఈ లిక్కర్ కేసు కూడా కేవలం ఆధారాల సేకరణ, నోటీసుల జారీ ప్రక్రియలకే పరిమితమై.. అంతిమంగా ఎలాంటి అరెస్టులు లేకుండా నీరుగారిపోయే ప్రమాదం ఉందని విశ్లేషకులు భావిస్తున్నారు. టీడీపీ సోషల్ మీడియా సృష్టిస్తున్న హైప్ ఎంత ఉన్నప్పటికీ, ఈ కేసు ఇప్పట్లో తేలేలా లేదనేది నగ్న సత్యం.
The post లిక్కర్ స్కామ్ ఇప్పట్లో తేలదా..? పాపం టీడీపీ సోషల్ మీడియా..! appeared first on Telugu Rajyam.
